İİM narazylyq aksıasyna shyǵyp ustalǵandar týraly málimdeme jasady, - dep habarlaıdy Qamshy.kz QazAqparatqa silteme jasap.

QR İİM Ákimshilik polısıa komıtetiniń tóraǵasy Igor Lepexa zańsyz mıtıń uıymdastyrmaq bolǵan adamdardyń ustalǵandyǵy týraly málimdeme jasady. 

Onyń aıtýynsha, Astanada mıtıńti uıymdastyrýǵa tyrysqan bir top azamat ustalǵan.

«Biz mıtıńti boldyrmaý úshin jumys istedik. Degenmen búgin bir top azamat zańsyz mıtıń uıymdastyrýǵa jáne ótkizýge tyrysty. Sondyqtan bizdiń qyzmetkerler olardy quryqtady. Keıin olardyń tulǵalary anyqtalyp, ne úshin kelgenderi belgili bolǵan soń, olar bosatyldy, - dedi I. Lepexa. - Búgingi ýaqyt boıynsha aıtarym, bul óte qysqa ýaqytta ótti. Sondyqtan naqty sandar keltire almaımyn. Osy jaǵdaıdy saralap jatyrmyz. Bir anyǵy elde zańsyz mıtıńiler tirkelgen joq, polısıamen qaqtyǵystar oryn almady, qoǵamdyq tártipti buzýǵa jol berilmedi. Keıinirek tolyqqandy aqparat bolady».

Onyń sózi boıynsha, Astanada «Báıterektiń» mańynda mıtıń ótkizý úshin ótinish berilgen. Degenmen qala basshylyǵy oǵan ruqsat bermedi. Sondyqtan mıtıńiler, sherýler zańsyz dep tanylyp otyr. 

Sonymen qatar ol Almatyda mıtıń uıymdastyrmaq bolǵan azamattarǵa qatysty da túsinikteme berdi. 
«Almatyda zańsyz mıtıń bolǵan joq. Jınalmaq boldy, biraq onyń da aldyn aldyq. Onda adamdar óte az boldy. Naqty aıta almaımyn, biraq shamamen 20-30 jınalypty. Biraq olardyń kóbi mıtıń ótip jatqandyǵyn, onyń zańsyz ekendigin de bilmegen, jáı ǵana kórýge, tyńdaýǵa kelgen. Olardyń barlyǵy jiberildi», - dedi I. Lepexa.