Jer reformasy jónindegi komısıanyń múshesi, belgili aqyn, aıtys óneriniń janashyry Júrsin Erman jer máselesine kelgende asa saq bolý qajettigin aıtady. Onyń aıtýynsha, qazir komısıa búginde qoǵamda daý týdyrǵan barlyq túıtkilder boıynsha halyqtyń kóńilinen shyǵatyn sheshimder qabyldap, jer máselesin jaýyp tastaý kerek, dep habarlaıdy Qamshy.kz Bnews.kz-ke silteme jasap.

Aqyn Júrsin Erman komısıaǵa múshe bolǵaly eldiń eń ózekti máselesine jaýapty bolyp otyrǵanyn aıtty.

«Meniń oıym halyqtyń oıy dep esepteımin. Komısıaǵa múshe bolǵannan beri Qazaqstannyń túkpir-túkpirinen hattar kelip túsip jatyr. Báriniń aıtatyny bir – jer satylmasyn! Aıaǵymyzdy ańdap basyp, qazaqtyń atameken jeriniń bir pushpaǵyn da satýǵa bolmaıdy. Múmkin keıin basqa sheshim qabyldaýǵa bolar, biraq dál qazir buǵan jol joq dep oılaımyz», – deıdi Júrsin Erman.

Onyń aıtýynsha, el azamattaryna jerdi jalǵa bersek te, saqtyq kerek. Qazaqstanda keminde 20 jyl turaqty ómir súrgen adamdarǵa berý sekildi tetikterdi oılastyrǵan abzal.

«Latıfýndıser degen bar, olar 500, 700 myń gektar jerdi alyp alǵan, bul ne degen soraqylyq. Jerdi jalǵa bergenniń ózinde oǵan shek qoıý kerek dep oılaımyn. Ári eger belgili bir merzim ishinde jerdi paıdalanbaıtyn bolsa, memleket ony qaıtaryp alyp, kádege jaratqany jón. Jerdiń artynda búkil qazaq ultynyń taǵdyry tur. Jer qazaq úshin eń basty másele. Sondyqtan durys tetikterin qabyldap, bekitip, jer máselesin jaýyp tastaý kerek», -degen pikirde komısıa múshesi.

Júrsin Erman Jer reformasy jónindegi komısıadan keıbir adamdardyń shyǵyp ketýine qatysty oıyn da jetkizdi.

«Komısıa músheleriniń komısıadan shyǵyp ketýin álsizdik dep esepteımin. Memleket «máseleni talqylańdar, sheshińder» dep komısıa quryp berdi. Osy komısıanyń ishinde otyryp, halyqtyń pikirin jetkizip, daýys berip, únińdi qospaısyń ba?! Bul osaldardyń pozısıasy dep oılaımyn», – deıdi ol.

Aıta ketsek, búgin Jer reformasy jónindegi komısıanyń ekinshi otyrysy ótti. Otyrysta Qazaqstan azamattaryna aýyl sharýashylyǵy jerlerin jeke menshikke satý nemese jalǵa berý máselesi qaraldy. Al 28 mamyrǵa belgilengen komısıanyń kelesi otyrysynda qoǵamdyq rezonans týdyrǵan jerdi sheteldikterge jalǵa berý máselesi talqyǵa túsedi.