Árbir baıandamasy kúlkige nemese daýǵa ulasyp jatatyn Mádenıet jáne sport mınıstri Arystanbek Muhamedıulynyń keshegi eseptik jıyny da qoǵamda áli qyzý talqylanyp jatyr. Bul joly tek qazaq emes, kórshi qyrǵyz eli de Qazaqstan mınıstriniń «birtúrli» áńgimelerin ártúrli túsinýde. Týrasyn aıtqanda, qyrǵyzdardyń A.Muhamedıulyna ókpesi qara qazandaı, - dep habarlaıdy Qamshy.kz Sn.kz saıtyna silteme jasap.
Ókpeleıtindeıi de bar, keshe Astanada eseptik jıyn ótkizgen Mádenıet mınıstri áıgili jazýshy Shyńǵys Aıtmatovty maqtaımyn dep otyryp, qyrǵyz halqynyń da, úkimetiniń de shamyna tıetin sózder aıtty.
«Jasyratyny joq, Máskeýge nemese ózge qalalarǵa ushyp kelseń qoǵamdyq dárethanalardy jap-jas qyrǵyzdyń qyzdary jýyp júredi. Bul árıne, kóńilge aýyr tıetini sózsiz. Naǵyz jastyq shaǵynda nelikten olar dárethana jýyp júr dep oılaısyń? Elinde jumys nemese bolashaq bolmasa árıne, qyrǵyzdar ózge qalalarǵa baryp kúneltýge májbúr. Osyny erterekte bilip eskertken Shyńǵys Aıtmatov — uly jazýshy», - degen bolatyn Arystanbek Muhamedıuly sol eseptik jıynda.
BAQ ókilderi de mınıstrdiń osynaý sózin ilip áketip, jarysa jarıalap jatty. Al, qazaqstandyq qoǵam belsendileri kórshi aǵaıynnan Muhamedıuly úshin keshirim surap, keıbir Mádenıet mınıstrlerinde mádenıettiń bolmaıtynyn aıtty.
«Qyrǵyz baýyrlarymnyń aldynda bul mınıstrdiń sózderi úshin keshirim suraımyn. Qaıtesiń endi, mádenıeti joq mınıstrler de bolady» deıdi qoǵam belsendisi, «Bolathan Taıjan» qorynyń prezıdenti Muhtar Taıjan.
«Qyrǵyz baýyrlar, bizdiń mınıstr úshin meni keshirińder. Qazaqstanda sheneýniktermen mundaı jaıttar jıi oryn alyp jatady. Olar jıi aqyldarynan da adasady» deıdi belsendi Aıan Sháripbaev.
«Qyrǵyz baýyrlarymnan keshirim suraımyn mynaý ońbaǵannyń aıtqan sózderi úshin» deıdi KTK telearnasynyń burynǵy basshysy Arman Shoraev.
Qaıyrymdylyq sharalardyń únemi basy-qasynda júretin Arýjan Saın de Muhamdeıuly úshin uıalyp keshirim suraıtynyn aıtty.
Qyrǵyzdar da qazaq halqyna túsinistikpen qaraǵanymen, óz ortalarynda qazaq mınıstriniń osynaý sózderin ártúrli talqylap jatyr. Bir tarap mundaı adamnyń úkimet quramyna qalaı enip ketkenine tańdansa, ekinshileri óz úkimetterin kinálaýda.
