Qytaı men Zambıa arasynda halyqaralyq janjal týyndady. Tipti Qytaı úkimeti Zambıadan álemdik qaýymdastyqtyń aldynda keshirim suraýdy talap etti. Óıtkeni, Zambıa medıasy «Qytaı syrt elderge adam etinen jasalǵan buqtyrylǵan et satady» degen aqparat taratqan.
Belgisiz bireýlerdiń áleýmettik jeliler arqyly asqan sheberlikpen jalǵan aqparat taratqan. Ol ǵalamtordyń arǵy jaǵynda otyryp, qytaılyq et óńdeý ornynda adamdardyń máıitterinen buqtyrylǵan et daıyndap, ony Zambıa satyp alady degen. Bul aqparat naqtylaný úshin sumdyq sýretter júktelip, et óńdeıtin seh ishinde adam deneleri kórsetilgen.
Maqalalar serıasy sýretterimen jarıalanǵannan keıin Qytaı zambıalyq baspasózdi tekserilmegen aqparatty, qaýesetti taratty dep aıyptady.
«Qytaılyqtarda ólini jerleıtin jer joq, sondyqtan olar máıitten buqtyrylǵan et jasaýdy sheshti» dep jazǵan maqalada. Tipti, baı-qýatty elderge «eń jaqsy etti» qaldyratyndaryn tuspaldap jazǵan. Osy oqıǵadan keıin, Zambıadaǵy Qytaı elshisi Iang Iýmıng bul aıyptaýlardy resmı túrde joqqa shyǵardy.
«Jergilikti gazet Qytaı eli Afrıkaǵa tilimdelgen adam etterin satpaq degen qaýeset taratqan. Bul jalǵan aqparat jáne jala jabý. Biz jergilikti basylymdardyń mundaı áreketterine batyl narazylyq bildirip, aıyptaımyz. Shyndyqqa janaspaıtyn qaýeset erteden kele jatqan áriptestik qarym-qatynasqa zıan tıgizýge baqyttalǵan», - dedi elshi.
Alaıda jeli boıynsha taraǵan sýretterde qytaı buqtyrmalary adam retinde kórsetilgen. Degenmen jalǵan derek birden ashyldy. Foto sýretter muqıat qaralyp, zerttelip, bul oıynǵa arnalǵan «Resident Evil 6» marketıńtik kompanıasynyń reklamaǵa arnalǵan bir bóligi bolyp shyqqan.
Myna sýretterdegi máıit sıaqty beıneler Londondaǵy Smıtfıld bazarynda atalmysh kompanıanyń jarnama túsirilimi ýaqytynda jasalǵan. «Zulym Vesker jáne onyń uly: Adam eti dúńgirshegi» dep atalatyn dúkenniń et satý bólimine arnaıy jasalǵan bolyp shyqty. Jáı kelýshilerge erekshelik úshin ǵana jasalǵan.
Aqparatty taratýshy zambıalyq azamat keshirim surady. «Zambıa memleketi Qytaı men Zambıa arasyndaǵy jaqsy qarym-qatynasty nazarǵa ala otyryp, bolǵan oqıǵaǵa ókinish bildiredi. Biz anyq-qanyǵyna kóz jetkizý úshin, tıisti organdar tergeýmen aınalysatyn bolady» dedi Qorǵanys mınıstri Krıstofer Mýleng.
