Búgin, dúısenbi, 24 naýryz kúni osy aıdyń basynda (8 naýryzda) Malaysia Airlines áýekompanıasyna tıesili Boeing-777 ushaǵynyń iz-tússiz joǵalyp ketý sebebi anyqtalyp, resmı túrde habarlandy. Málimdemeden belgili bolǵandaı, áýekemesin eshkim eshqaıda urlap áketpegen. Malaysia Airlines áýekompanıasy taratqan habar boıynsha, ushaq Úndi muhıtynyń ońtústik aımaǵyna qulap túsken.
Keıin bul habardy el premer-mınıstri Nadjıb Razak ta rastady. Odan bólek, ol bul sýyt habardy jolaýshylardyń týǵan-týystaryna jetkizgenin de habarlady:
«Biz bul jaǵdaıdyń dál osylaı qaıǵyly aıaqtalǵanyna úlken ókinish bildiremiz. Ushaqtyń apatqa ushyrap, muhıt aıdynyna qulaǵanyna esh kúmán joq. Biz ushaqtyń shyndyǵynda da Úndi muhıtyna qulaǵan faktisin moıyndaýymyz kerek»,-dep málimdedi Nadjıb Razak.
Reuters agenttigi habarlaǵandaı, aldyn-ala boljamdar boıynsha, Boeing bortynda bolǵan adamdardyń birde-bireýi aman qalmaǵan.
Qazirgi kezde tergeýshiler Boeing-777 kemesin basqarǵan pılottardyń ómirbaıany men jumys ornyndaǵy barlyq faktilerdi muqıat tekserýde. Osyǵan baılanysty osydan birneshe ýaqyt buryn ushaqtaǵy ekinshi pılot Farık Abdýl Hamıd jóninde qyzyqty aqparat taraǵan edi. Ol boıynsha, Abdýl Hamıd Boeing-777 ushaǵynyń tizginin osymen tek besinshi márte ustaǵan kórinedi. Al 8 naýryz kúni ol tuńǵysh ret tolyqqandy ekıpaj múshesi retinde, ıaǵnı ınspektordyń qadaǵalaýynsyz ushqan.
Alaıda Malaysia Airlines áýekompanıasy bul jaǵdaıdyń bolǵan oqıǵaǵa esh qatysy joq degendi aıtady: bul kópshilik kompanıada bolatyn pılottar arasyndaǵy tájirıbe jumysy. Onyń ústine, osyǵan deıin basshylyq pen ınspektorlardyń Abdýl Hamıdke birde-bir shaǵymy ne eskertýi bolmaǵan eken.
Sondaı-aq búgin izdestirý jumysymen aınalysyp jatqan topqa qosylǵan Aýstralıa eliniń bir kemesi keshe Qytaı jer serigi ǵaryshtan túsirip alǵan aımaqqa (Qytaılyq jer serigi Úndi muhıty betinen apatqa ushyraǵan ushaqqa tıesili bólshekterdi taýyp alǵan) attanyp ketti.
Esterińizge salar bolsaq, Malaysia Airlines áýekompanıasyna tıesili ushaq 8 naýryzǵa qaraǵan túni Ońtústik Qytaı teńizi ústinde ushap bara jatqan jerinen radardan ǵaıyp bolǵan. Boeing-777 áýekemesi Kýala-Lýmpýr – Pekın marshrýty boıynsha kezekti reısine attanǵan edi. Onyń bortynda barlyǵy 227 jolaýshy men 12 ekıpaj múshesi bolǵan. Laınerdegi jolaýshylar arasynda bir Reseı, eki Ýkraına jáne 150-den astam Qytaı azamattarynyń bolǵandyǵy belgili bolyp otyr.
Bolat Qosmaǵambet
Derekkóz: Masaget
