Astana kúnine oraı, memlekettik baǵdarlamamen salynǵan úıler jappaı taratylady dep jurtqa Sms jibergen kelinshek ustaldy. 30 jastaǵy áıeldiń jalǵan habarlamasynan keıin úı alamyz degen halyqtyń shýy áli basylǵan joq. Al kesheden beri 10 júzdik telim tıedi-aý dep Astana ákimdigin jaǵalaǵan jurt, búgin de tarqar emes. Sebebi olarǵa da osy tektes Cms-habarlamalar kelip jatqan kórinedi, - dep habarlaıdy Qamshy.kz 31 arnaǵa silteme jasap.
Osymen ekinshi kún jurt jappaı ákimdik aldyn torýyldap júr. Tipti osynda túnimen otyrǵandar bar eken. Báriniń úmiti-sol 10 júzdik telim. Keshe ákimdik jer bıyl berilmeıdi dese de, eshkimniń alańnan aıaq attap basqysy joq. Sebebi mundaǵy qyzmetkerler kezek jasap, turǵyndardyń ótinish-qujattaryn qabyldap jatyr. Sondyqtan telimnen qur qalýǵa qoryqqan jurt ultaraqtaı jer áıteýir buıyrady ma dep úmittenip áli otyr.
"Qur úmittendirmeı aldymyzǵa shyǵyp jer berilmeıdi, tarańdar" dep aıtsyn deıdi jınalǵandar. Alaıda jeti óńirde jer bıyl beriledi degen Ulttyq ekonomıka mınıstrliginiń habarlamasyna keshe ákimdik jaýap bergen. Astana men Almatyda daıyn jer joqtyǵyn da aıtqan.
TÓLEÝǴAZY NURKENOV, Astana qalasy jer qatynastar basqarmasynyń basshysy:
- Astananyń bas josparyna sáıkes 45 myń jeke turǵyn úı kózdelgen. Onyń 30 myńy salynyp qoıyldy. 2030 jylǵa deıin atalmysh jerlerge sý júrgizilip, elektr tartylǵannan keıin ǵana qalǵanyn bere alamyz. Ázir jerler daıyn emes.
Biraq turǵyndar tarqar emes. Ákimdik bolsa, ótinishterdi qabyldamaýǵa quqyǵymyz joq dep otyr. Biraq, ótinish qabyldandy degen - jer beriledi degendi bildirmese kerek. Al sengish jurttyń toptalyp jınalǵanyn paıdalanǵan bázbireýler munda kádimgideı bıznes jasap júr. Munsyz qabyldamaıdy dep sendirip, ótinish jazatyn blankyny 100 teńgege saýdalaǵandar tabyldy.
Bir paraqty 100-50 teńgege alyp jatqandar tipti telim taratylady degen habarlama alǵanyn aıtady. Ol úshin ákimdikke kelińder degen mátin de bolǵan. Al kúni keshe memlekettik baǵdarlamamen salynǵan úıler beriledi dep sms taratyp, jurtty dúrliktirgen kelinshek búgin ustalypty. Buryn alaıaqtyq úshin isti bolǵan 30 jastaǵy áıel osy jolǵy jalǵan habarlamasy úshin 1 jylǵa sottalýy múmkin.
SOFÁ ANÝARBEKOVA, Astana qalasy, İİD baspasóz jetekshisi:
- Kúdiktige tıesili telefon, sım karta tárkilendi. Tergeý barysynda anyqtalǵandaı buryn bul azamatsha qylmystyq iske tartylǵan.
Al telim boıynsha sms jibergenderdiń kim ekeni ázirge belgisiz. Jaýapty organdar mán-jaıdy anyqtaımyz dep otyr.
