Jer ıelenýshilerge qatań talap qoıylatyn bolady, - deıdi Jer reformasy jónindegi komısıa músheleri. Bul týraly Qamshy.kz «Habar» arnasyna silteme jasap habarlaıdy.
Jer arǵy úsh atasy Qazaq jerinde týǵan azamattarǵa ǵana jalǵa berilsin! Bul – búgin Jer reformasy jónindegi komısıanyń janynan qurylǵan Quqyqtyq jumys tobynyń jetekshisi Muhtar Taıjannyń usynysy.
Quqyqtyq jáne aqparattyq-túsindirý jumys toptarynyń alǵashqy otyrysynda ózge de mańyzdy bastamalar kóterilip, aldaǵy kúnderge naqty jospar jasaldy.
Jer – kópshiliktiń kóńilin kúpti qylǵan ózekti másele. Quqyqtyq jumys tobynyń ókilderi jurtshylyqtyń oıyndaǵysyn dóp basatyn ári buǵan deıin eskerilmegen birqatar mańyzdy usynystar jasady. Máselen, Májilis depýtaty Bekbolat Tileýhan soltústikte bos jatqan shuraıly jerlerdi ońtústiktiń halqyna berý kerek degen bastama kóterdi.
Sonymen qatar, jerdiń kez kelgen jaǵdaıda sheteldikterge satylýyna tyıym salynýyn zańmen bekitýdi usynyp, jalǵa berilgen jaǵdaıda, ol jerde tek Qazaqstan azamattary jumys jasaýy qajettigin atty.
Bekbolat Tileýhan, QR Parlamenti Májilisiniń depýtaty:
-Olarǵa jumys kúshin ákelýge zańmen tyıym salý kerek. Buzǵan jaǵdaıda elderine qaıtarý kerek. Iaǵnı qandaı sheteldik ınvestor kelse de, olardyń jumys ornynda qazaq ısi ańqyp turý kerek.
Basqosýda jerdi bankke kepildikke qoıýǵa tyıym salý jaıy da talqylandy. «Jáne jerdi 3 jyl ishinde tıimdi ıgere almaǵandardan qaıtaryp alý máselesi kóterilip, onyń qunarlylyǵyn joǵaltyp, tozdyrǵandardy jaýapkershilikke tartý qajet», – dedi jumys tobynyń jetekshisi Muhtar Taıjan.
Muhtar Taıjan, Jer reformasy boıynsha komısıanyń Quqyqtyq jumys toby jetekshisi:
-Úsh atasy Qazaqstanda týǵan azamattaryna ǵana jerdi berý kerek dep oılaımyn. Biraq árıne, oralmandarǵa, elimizge oralǵan qandastyrymyzǵa berýimiz kerek. 10 jyl sata almaıdy, ózi aınalysý kerek. Sosyn jalpy aýdanynyń kóleminde emes, jalpy memlekettik shekteý bolady.
Al aqparattyq-túsindirý jumys toby «Feısbýktan» Jer reformasy boıynsha komısıa dep atalatyn arnaıy paraqsha ashqan. «Onda barlyq azamattardyń usynystary men jerge qatysty búkil málimet jarıalanady, – dep sendirdi top jetekshisi.
Murat Ábenov, Jer reformasy boıynsha komısıanyń aqparattyq-túsindirý jumys toby jetekshisi:
-Jer salasynda qansha zań buzýshylyqtar bar? Kimniń qolynda? Mysaly, kóp jerdi alyp alǵandar bar ekendigin bilemiz. Qalaı alǵan? Nege zańsyz aldy? Nege ony qaıtyp almaımyz? Jáne onyń artynda kim tur? Ekinshi másele, búgin jer ala almaı júrgender bar. Olardyń jaǵdaılary qalaı bolady? Barlyq daıyndaǵan aqparatty tek komısıa múshesine emes, azamattarǵa usynýymyz kerek. Ár azamat bilý kerek.
Sonymen qatar, elimizde 14 mamyrdan beri jumys jasap jatqan call-ortalyqtaryna 2 myńnan astam azamat qońyraý shalyp, 900-ge jýyǵy saýaldaryn joldaǵan.
Alaıda, jurtshylyqty mazalaǵan suraqtardyń tek 30 paıyzy tikeleı Jer reformasyna qatysty. Degenmen olardyń barlyǵy tirkeýge alynyp, komısıa músheleriniń qaraýyna jiberiledi.
