Pavlodar oblysynda aýyl ákimi ákimdik ǵımaratyna memlekettik tý ilmegeni úshin ákimshilik jaýapkershilikke tartyldy. QR Ákimshilik quqyq buzýshylyq týraly kodekstiń "QR memlekettik rámizderin qoldaný tártibin buzý" baby boıynsha jaýapqa tartylǵan ákimge aıyppul salyndy. "Sot Pavlodar oblysy Alekseev aýyldyq okrýginiń ákimi Symbat Shahmetovany 3-6 naýryz aralyǵynda ákimdik ǵımaratyna QR Memlekettik Týyn ornatý men ornalastyrýdy qamtamasyz etpeý túrindegi ákimshilik quqyqbuzýshylyqty jasaýǵa kináli dep tapty. Sottyń qaýlysymen oǵan 200 aılyq eseptik kórsetkish kólemindegi somasy 370 400 teńge bolatyn ákimshilik aıyppuldy memleket paıdasyna aýdarý jazasy belgilendi", - dep habarlady sot ókilderi. Sot otyrysy barysynda aýyl ákimi óz kinásin moıyndap, istegen isine ókinish bildirdi. Onyń aıtýynsha, ákimdik ǵımaratyndaǵy eski tý ábden tozyp ketip, aýystyrýdy qajet etip turǵan. Sol sebepti ol týdy alyp tastaýdy buıyrǵan. Derekkóz: http://kaz.tengrinews.kz/