Qalalyq máslıhattyń VI kezekten tys shaqyrylymynda qala ákimi Baýyrjan Baıbek Medeý jáne Naýryzbaı batyr aýdandarynyń ákimin taǵaıyndady, - dep habarlaıdy Qamshy.kz.

«Medeý aýdanynda 200 myń adam turady. Bul qala halqynyń 12 paıyzy. 22 myń stýdent turady. Munda Medeý, Shymbulaq negizgi nysandary, 60 mádenı nysan ornalasqan. Aýdan 400 mlrd teńge kóleminde tabys ákeledi. 109 mlrd ınvestısıa jáne bar», - degen qala basshysy Erjan Jylqybaevty Medeý aýdanynyń ákimi etip taǵaıyndady. 

Erjan Jylqybaev 1982 jyly OQO-da dúnıege kelgen. 2003-2004 jyldary OQO ekonomıka departamentiniń bas mamany, 2007 jyly Ekonomıka jáne búdjettik josparlaý mınıstrliginde bólim basshysy, 2007-2009 jyldary Eńbek jáne áleýmettik qorǵaý mınıstriniń kómekshisi, 2009 jyly SHQO ákiminiń kómekshisi, 2014-2016 jyldary QR Prezıdenti ákimshiligi bóliminiń memlekettik ınspektory qyzmetin atqaryp kelgen. 

Aýdannyń eks-ákimi Sultanbek Mákejanov óziniń densaýlyǵyna baılanysty jumystan ketý týraly aryz jazǵan.

Qalalyq máslıhattyń osy shaqyrylymynda Baýyrjan Baıbek Naýryzbaı aýdanynyń da jańa ákimin taǵaıyndady. 

«Naýryzbaı aýdany 2014 jyly qurylǵan. Munda 150 myń adam turyp jatyr. Resmı tirkelgenderdiń sany 53 myń. Halyqtyń kópshiligi tolyq kólemde salyq tólep otyrǵan joq. Jyljymaıtyn múlik, avtomobıl tirkelmegen. Tabystyq baza boıynsha óte kúrdeli aýdan. Turǵyn úı qorynda problema jetedi. Ortaq keshendi jospar bolý kerek», - degen qala ákimi bul aýdanǵa basshy etip Saıran Saıfedenovty taǵaıyndady.

Saıran Saıfedenov 1974 jyly BQO-da dúnıege kelgen.

2006 jyldan bastap Almaly aýdanyndaǵy uıymdastyrý jáne kadrlyq basqarmasynda bas maman bolyp jumys istegen.

2008 jyldyń tamyzynan Almaty ákimi apparatynyń uıymdastyrý jáne kadrlyq basqarmasynda bas maman qyzmetin atqarǵan. 2009 jyldyń maýsymynan Áýezov aýdany ákiminiń orynbasary bolyp qyzmet etti.

Naýryzbaı aýdannyń burynǵy ákimi Qýanysh Qashqymbaev memlekettik basqarmaǵa jetekshi bolyp taǵaıyndalmaq.