Qazaqstannyń Bas prokýratýrasy elde zańsyz mıtıńiler ótkizý árketteri jaıly málimdeme jasady, - dep habarlaıdy Qamshy.kz.

Bas prokýratýra ókilderiniń aıtýynsha, elimizdiń jekelegen óńirlerinde jer máseleleri jóninde zańsyz qarsylyq sherýlerin ótkizýge áreketter jasaldy. "Shynaıy aqparat berý maqsatynda sizderge tómendegi máselelerdi habarlaı alamyz. Zańsyz áreketterdiń aldyn-alý úshin Bas Prokýror halyqqa eki ret úndeý joldap, mıtıń ótkizýdiń tártibi men zańsyz sherýlerge qatysqany úshin azamattardyń jaýapkershiligin túsindirdi. Bul úndeýler buqaralyq aqparat quraldary jáne basqa da komýnıkasıa arnalary arqyly keńinen taratyldy. Sonymen birge, zańsyz sherýlerge qatysý nıetin ashyq jáne týra jarıa etken barlyq adamdarmen túsindirý jumystary júrgizildi", - delingen habarlamada.

Osyǵan qaramastan, jekelegen tulǵalar mıtıńter týraly zańnamany elemeı, adamdardy zańsyz sherýlerge qatysýǵa ıtermelep, arandatýǵa tyrysypty. Olardyń túpki maqsattary, prokýratýradaǵylardyń aıtýynsha, beıbit sherýler nemese jer kodeksin ózgertý emes, qoǵamdyq saıası ahýaldy shıelenistirý, ultaralyq alaýyzdyqty qozdyrý jáne bılikti basyp alý.

"Olar jappaı tártipsizdikterdiń búlikke, ozbyrlyqqa, tonaýǵa, tipti adam shyǵynyna ákelip soqtyrýy múmkin ekenin jaqsy biledi. Ondaı oqıǵalardyń saldary qandaı bolaryna Lıvıa, Sırıa, Mysyr jáne birqatar burynǵy keńestik keńistiktegi elder aıqyn mysal bola alady. Búginde quqyq qorǵaý organdary birqatar qylmystyq isterdi tergeýde. Jappaı tártipsizdikterdi uıymdastyrý úshin san túrli tásilder paıdalanyldy. Qyzylorda qalasynda tártip saqshylaryna tas laqtyryp, olardy kúsh qoldanýǵa ıtermeleý áreketteri jasaldy", - dep habarlady Bas prokýratýradaǵylar.

Sosyn, áleýmettik jelilerde tártip saqshylary óltirdi dep, er adamnyń máıitiniń sýreti taratyldy. Shyn máninde, bul Qytaıda bolǵan oqıǵadan túsirilgen sýret bolǵany, bul aqparattardyń jalǵandyǵy ýaqtyly áshkerelengeni aıtylady.

Shyǵys Qazaqstan oblysynda polısıanyń nazaryn oblys ortalyǵynan basqa jaqqa aýdaryp, Óskemen qalasynda tártipsizdikter uıymdastyrýdy jeńildetý úshin birqatar aýdan ortalyqtarynda aldyn-ala sherýler uıymdastyrý josparlanǵan. Oral men Atyraýda beıbit sherýdi jeleý ete otyryp bılikke kúsh qoldaný, onyń ishinde qarý qoldaný arqyly qarsy shyǵýǵa daıyndyqtar jasalǵan.

Arandatýshylardyń áreketteri ózara kelisilgen sıpatta bolǵany týraly málimetter bar. Almatyda júrgizilgen jedel sharalar barysynda qalada jappaı tártipsizdikter uıymdastyrýǵa daıyndalǵan birqatar tulǵalar ustaldy.

Onda qarý-jaraq, oq-dári, biltemirler, "Molotov kokteıli" dep atalatyn janarmaılar quıylǵan shólmekter jasyrylǵan qoımalar tabyldy. Munyń bári Prezıdent moratorıı jarıalaǵan jáne jer zańnamasyna qatysty usynys engizgisi keletin búkil azamattar jumysyna qatysyp jatqan Komısıa men barlyq óńirlerdegi Qoǵamdyq Keńesterdiń jumysy bastalǵan kezde boldy.

Memleket tarapynan jer kodeksine baılanysty órkenıetti dıalogqa jáne barsha pikirlerdiń eskerilýine barlyq jaǵdaı jasaldy. Osylaısha, túrli óńirlerinde bolǵan zańsyz aksıalardyń bári bir qoldan shyqqandaı áser qaldyrady. Atalǵan qylmystyq isterdiń aıasynda osy quqyqqa qaıshy áreketterdiń zańsyz qarjylandyrylýy zerttelýde, olardyń qarjy kózderi týraly aqparattar tekserilýde.

"Tergeý nátıjesi boıynsha, arandatýǵa qatysy bar adamdardyń is-áreketterine quqyqtyq baǵa beriletin bolady. Tergeý amaldary tolyqqandy bolýy úshin bul faktilerge qatysty júrgizilip jatqan tergeý jumystary jaıly egjeı-tegjeıli aıtylmaıdy. Aldaǵy ýaqytta Bas Prokýratýra tergeý sharalarynyń barysy týraly turaqty túrde aqparat berip otyratyn bolady", - delingen taralǵan habarlamada.