Astanada iri jemqorlyq zańbuzýshylyqtar úshin aıyptalǵan Talǵat Ermegıaevtiń isi boıynsha sot isi jalǵasýda. Aıyptaýshy taraptyń málimdeýinshe, Talǵat Ermegıaev pen taǵy 22 adam 10 mıllıard teńgeden astam qarajatty jymqyrǵan. Onyń 4,2 mıllıardyn Ermegıaevtiń bir ózi qaltasyna basqan, - dep  habarlaıdy Qamshy.kz BNews.kz-ke silteme jasap.

Búgin sot otyrysy barysynda 12 kúdikti men prokýrorlar arasynda prosesýaldyq kelisim jasalǵany belgili boldy. Osylaısha aıyptalýshylar  sot isine tolyqtaı qoldaý jasaýǵa kelisimderin berdi. Osy arqyly olar qylmystyq jaýapkershilikti jartylaı alyp tastaýdan úmitti.
Kelisim jasaǵandardyń qatarynda «Astana EKSPO-2017» basqarma tóraǵasynyń burynǵy keńesshisi Qajymurat Úsenov, «Astana EKSPO-2017» Qurylys jónindegi dıreksıa» fılıalynyń burynǵy dırektory Vácheslav Págaı, «Southfork ltd.» JSHS atqarýshy dırektory Seıit Seıitov, «Southfork ltd.» JSHS bas dırektory Nurlan Aqpanbetov, «Qurylyskonsaltıng» Ulttyq ortalyǵy» AQ dırektorynyń mindetin atqarýshy Serik Naızabekov, Almatyda jalǵan kásiporyndar jelisin uıymdastyrýshy  Sergeı Ilın, T.Ermegıaevtiń senimdi adamy Renat Aqylbekov, «Kompanıa ADS» JSHS prezıdenti Mars Shormanov, «Kompanıa ADS» JSHS quryltaıshysy Alpysbek Tilekmetov, «Dos Group» JSHS dırektory Samat Sardarbekov, «SS Electric Indastry» JSHS dırektory Talǵat Saǵyndyqov jáne «Petrospek» JSHS dırektory Erlan Tileýov bar.