Ál-Farabı atyndaǵy QazUÝ janyndaǵy Konfýsıı Instıtýty kitaphanasy «ál-Farabı jáne qazirgi zaman» atty qytaı tilindegi biregeı oqý quralymen tolyqty, - dep habarlaıdy Qamshy.kz.

QazUÝ-da Lanchjoý ýnıversıtetiniń qatysýymen Konfýsıı Instıtýttarynyń Konsýltatıvti Keńesi ótti. Tórt jaqty Konsýltatıvti Keńes jınalysyna ál-Farabı atyndaǵy QazUÝ-dyń, Lanchjoý ýnıversıtetiniń, Tashkent memlekettik Shyǵystaný ınstıtýtynyń, Tbılısı bostandyq ýnıversıtetiniń ókilderi qatysty.

Qazaqstan Qytaıdyń «Bir aımaq – bir jol» atty jahandyq jobasyn júzege asyrýda strategıalyq seriktesi. Bul úderiske ýnıversıtetter de bilimge negizdelgen jańa ınovasıalyq ekonomıkanyń damý núktesi retinde ózderiniń úlesin qosady. Ortalyq Azıa boıynsha Jibek joly ýnıversıtetteri Alánsynyń Haby retindegi qyzmeti QazUÝ jumysynyń basty baǵyty.

Konfýsıı ınstıtýttary jumystarynyń mańyzdy baǵyttarynyń biri – seriktes ýnıversıtetter arasyndaǵy baılanysty odan ári damytý joldaryn anyqtaý. Lanchjoý ýnıversıtetimen tyǵyz baılanystyń arqasynda búginde QazUÝ  akademıalyq utqyrlyq jáne qos dıplomdy bilim alý baǵdarlamasy boıynsha stýdentterdi daıyndap, ǵalymdar men oqytýshylar ǵylymı konferensıalarǵa qatysýda. Sonymen qatar birlesken jobalar da júzege asýda.

 «Búgin biz qytaılyq áriptestermen Shyǵystyń uly oıshyly Ábý Nasyr ál – Farabı murasyn taratýdy basty maqsat etken birlesken jobanyń nátıjesin usynamyz. Instıtýttyń Kitaphana qory «Ál-Farabı jáne qazirgi zaman» atty qytaı tilindegi biregeı oqý quralymen tolyqty», - dedi QazUÝ-dyń birinshi prorektory Muhambetqalı Búrkitbaev.

Lanchjoý ýnıversıtetiniń prorektory Pan Baý Tıen: «Biz ǵylymı-aǵartýshylyq baǵyttaǵy seriktestikti odan ary damytýǵa jáne eki el arasyndaǵy kópjaqty seriktestikke jańa serpin berýge nıettimiz» - dep atap ótti.

Qazaqstan Respýblıkasyndaǵy qytaı tili boıynsha joǵary bilikti mamandar daıyndaýdan jetekshi ortalyq bolyp tabylatyn QazUÝ janyndaǵy Konfýsıı ınstıtýtynyń tabysty qyzmeti – Qazaq ulttyq ýnıversıteti men Lanchjoý ýnıversıteti arasyndaǵy uzaq jyldyq áriptestik pen birlesken kúshtiń nátıjesi. 

Taraptar ál-Farabı atyndaǵy QazUÝ-da Jazǵy til mektebin birlesip uıymdastyrý usynysyn biraýyzdan qoldady.