Bala tárbıesinde kishkene kúninen bastap qalyptastyrǵan qasıetter boıyna tez sińip ketetinin bilemiz. Biraq naqty ne isteý kerek, neni úıretken durys sol jaǵyn bile bermeıtinimiz anyq. Sondyqtan nazarlaryńyzǵa kishkene balaǵa neni úıretý kerektigi týraly materıaldy usynyp otyrmyz.
1. Jaqyn adamǵa qamqorlyq jasaý, kómek kórsetip, janashyr bolý. Osy qasıetter adam boıyna kishkene kúninen bastap sińe berýi kerek. Sábı onyń kómegi men qamqorlyǵyna da zárý jandar bar ekenin bilgen abzal. «Bir jaqsylyq jasap, onyń ornyna syılyq alasyń» dep úıretý - úlken qatelik. Onyń ornyna adamdar bir-birine kómektesý kerek ekenin túsindirip, bunyń adamshyldyqtyń basty belgisi ekenin óz ispen dáleldep otyrý qajet.
2. Óz qateligin moıyndaı bilý. Biz «keshir» degen biraýyz sózdi aıtýdyń qanshalyqty ońaı emes ekenin bilemiz. Al balaǵa bul tipten qıynǵa soǵatynyn eskerýimiz kerek. Bala óziniń áreketimen bireýdi renjitip qoıǵanyn túsinse de, ol ony tez umytyp ketedi. Eger balańyzdyń qate jasaǵanyn kórseńiz, yrqyna kóne berýdiń ornyna, jaqsy-jaman, bolady-bolmaıdy degen tyıymdardy da úıretken mańyzdy. Bala kez kelgen jaǵdaıdy ózi taldap-tarazylaı alýy kerek. Sol kezde ǵana ol óziniń qate jasaǵanyn túsinip, keshirim suraýdy da birtindep úırenedi.
3. Sypaıylyq. Bala týǵannan bastap «rahmet», «sálemetsiz be» , «saý bolyńyz» degen sıaqty sózderdi óte jıi estip turýy tıis. Biz onyń mán-maǵynasyn túsindirmeı-aq, oǵan adamdarmen qarym-qatynas jasaýdyń negizgi tetikterin úırete bastaımyz. Bala kezinen boıyna sińgen sypaıylyq, alǵys bildirý sıaqty qasıetter eresek ómirinde kez kelgen ortada til tabysyp, kez kelgen jaǵdaıdan ońaı shyǵýǵa kómektesedi.
4. Tártip pen jeke basynyń tazalyǵy. Kıim tazalyǵy, syrtqy uqyptylyq, oıynshyqtaryn kútip ustaý sıaqty qasıetter balanyń qajetti ádetterdi boıyna qalyptastyrýyna yqpal etedi. Birte-birte ol óziniń aınalasyn retke keltirip júrýdi úırenedi. Zattaryna uqypty adam ómirine de uqyptylyqpen qaraıtynyn umytpaýymyz kerek.
5. Til tabysa bilý. Qoǵamda ómir súre otyryp, adamdarmen aralaspaý múmkin emes. Sondyqtan biz balany adamdarmen tanysýǵa, jyldam dostasyp ketýge úıretýimiz kerek. Qarym-qatynas jasaı bilý balanyń keıingi ómirinde mańyzdy ról atqarady. Sondyqtan dál osy tusty nazardan tys qaldyrmaǵan jón.
6. Qaýipsizdik. Baǵdarshamnyń qyzyl túsinde joldan ótýge bolmaıdy, tanymaıtyn adamdarmen sóılespeý kerek, olar shaqyrsa, barmaý kerek. Osy sıaqty balanyń qaýipsizdigine qatysty erejelerdi kishkene kúninen bastap mıyna quıa bergen abzal, dep jazady anabol.kz.
