Naýryz meıramyn amerıkan jerinde resmı deńgeıde ǵana emes, qarapaıym azamattar, Amerıka Qurama Shtattaryndaǵy qazaq dıasporasynyń ókilderi de atap ótedi.
Nú-Iork turǵyny, Tarazdyń týmasy Álıma Qalybaeva QazAqparat tilshisine telefon arqyly Qazaqstannan shyqqan adamdar jyl saıyn osy ejelgi shyǵys merekesin atap ótý úshin Naýryz kúnderi bas qosatynyn aıtty. Ádette ártúrli sharalarǵa qatysýǵa ýaqyt bola bermeıdi. Biraq ta Naýryzdyń jóni bólek, bul kúni qazaqsha et asyp, bir-birimizdi quttyqtap jatamyz, - dedi A.Qalybaeva. - Bizdiń merekemizdi qarapaıym amerıkandyqtar da bólisedi, munda kez kelgen merekeni atap ótýdi jaqsy kóredi».
90 jyldardyń aýyr kezeńderinde ol Tarazdan jaqsy ómir izdep, shetel asqan bolatyn, ol amerıkandyq iri megapolıste ornyǵyp, mamandyǵy boıynsha (tiginshi) jaqsy jumysqa ornalasty, jerles-dostar ta tabyldy.
«Bizdiń adamdar ol jaqta da az emes, - dep áńgimeleıdi A.Qalybaeva. - Jıi kezdesip turamyz, ulttyq merekelerimizdi atap ótemiz, tilimizdi, mádenıetimizdi jáne salt-dástúrlerimizdi umytpaımyz. Bizdiń qazaq jeriniń bultsyz aspanyn, jazıraly dalasyn saǵynamyz. Bizdiń qymyzǵa, qazaqsha etke ne jetsin!..».
A.Qalybaeva Naýryz merekesin otbasynda Táýelsizdikten buryn da atap ótkenin eske aldy. «Bala kúnimde ájemizdiń jeti túrli tamaq túrin qosyp, naýryz-kóje ázirlegeni, sóıtip, kún men túnniń teńesken uly kúnin atap ótkenimiz esimde qalypty», - deıdi ol.
Eske sala keteıik, 24 naýryzda AQSH astanasy Vashıngtonda Nowruz Commission úkimettik emes uıymy men Naýryzdy dástúrli atap ótetin elderdiń, arasynda Qazaqstannyń elshiligi de bar, Vashıngtonda tirkelgen dıplomatıalyq ókildikteri uıymdastyrýymen Naýryz meıramyn merekeleýge arnalǵan besinshi saltanatty gala-konsert ótti.
Nowruz Commission uıymyn qurýǵa jáne AQSH-ta Naýryzdy merekeleý ıdeıasyna belgili kásipkerler jáne mesenattar Nasser Kazemını men Bıjan Qıan, sondaı-aq osy elde elshi bolǵan qazirgi QR syrtqy ister mınıstri Erlan Ydyrysov bastamashy boldy. Bıylǵy jyly 500-ge jýyq adam - AQSH-tyń resmı adamdary, dıplomatıalyq korpýs, bıznes, taldamalyq toptar ókilderi, ǵalymdar men qoǵam qaıratkerleri mereke qonaǵy boldy.
inform.kz
