Keshe áleýmettik jelilerde Aqmola oblysyndaǵy Bestóbe kentinde «Qazaqaltyn» AQ-ǵa qarasty kenishterdiń birinde bolǵan atys vıdeosy tarady, - dep habarlaıdy Qamshy.kz.
Atqan kim, atqyzǵan kim? Ol jaǵy ázirge belgisiz. Jazbada oq tıip jaralanǵandar kórinbegenimen, birneshe ret atylǵan myltyq daýsy anyq estiledi. İİM baspasóz qyzmeti basqarmasynyń bastyǵy Oleg Ivashenko kıkiljińniń kompanıa jumysshylary men kásiporyndy kúzetetin «Mys orda» kúzet agenttigi qyzmetkerleri arasynda bolǵanyn, qazir oqıǵanyń mán-jaıy anyqtalyp jatqanyn aıtypty.
«Jumysshylarǵa atyp jatyr (vıdeoda – red.), aspanǵa atyp jatyr ma, jerge atyp jatyr ma, belgisiz. Myltyq travmatıkalyq qarý bolýy da múmkin. Barlyǵy anyqtalýda. Jumysshylar men kúzetshiler arasynda qaqtyǵys boldy. qazir anyqtaý ústindemiz. Múmkin, kúzetshiler aspanǵa atqan bolar. Múmkin jumysshylardy, múmkin torǵaılardy atqan shyǵar. Munyń barlyǵy tergeý barysynda anyqtalady»,- depti ol.
O. Ivashenko sondaı-aq, jelide taraǵan vıdeonyń da tekseriletinin, qaqtyǵystyń túpki sebepteri de anyqtalatynyn aıtyp otyr.
Oblystyq İİD buǵan deıin atysstyń 16 maýsym kúni bolǵanyn, jumysshylar kúzetshilerdiń jeke zattaryn tekserý týraly talaptaryna qarsylyq tanytyp, arty qaqtyǵysqa ulasqanyn habarlaǵan edi. Oqıǵa ornyna Stepnogorsk qalasynyń prokýrory, İİB bastyǵy men jedel-tergeý toby jetip, anyqtaý jumystaryn júrgizýde. Ázirshe «Buzaqylyq» baby boıynsha is qozǵalǵan. Eki taraptan da jaraqat alǵandar bar.
«Qazaqaltyn» ken-metallýrgıalyq kombınaty» AQ-y elimizdegi kóne kásiporyndardyń biri bolyp sanalady. Tarıhy 1932 jyldan bastalatyn altyn óndirý kásiporyny 1999 jyly «Qazaqaltyn» JSHS bolyp qurylǵan. Sodan beri kompanıa uıymdyq-quqyqtyq formasyn birneshe ret ózgertken. «Bestóbe», «Aqsý», «Jolymbet» kenishteri men eki fabrıkaǵa ıelik etedi.
Qaqtyǵysta aty atalatyn ekinshi kompanıa «Mys orda» JSHS týraly ashyq kózderde málimet az. Tek kúzet agenttiginiń elimizdiń birqatar oblystaryndaǵy óndiris nysandaryn kúzetetini belgili bolyp otyr.
Al, kúzetshilerdiń qarýsyz jumysshylarǵa oq atýǵa quqyǵy bar ma, jumysshylardyń jeke zattaryn tekserý, olarǵa kúsh qoldaný tártibi qandaı qujattarmen belgilengen, altyn óndirýshi kompanıa basshylyǵy bul oqıǵaǵa qandaı baǵa beredi degen suraqtar jaqyn kúnderi jaýabyn tabady degen senimdemiz. Bir anyǵy jeke menshik kúzet qurylymy jumysshylarǵa qarata oq atqany. Sondyqtan da muny ishki, qyzmettik sıpattaǵy kıkiljiń dep jyly jaýyp qoıýǵa bolmaıdy. Eńbek ınspeksıasy, prokýratýra mamandary da áleýmettik shıeleniske laıyqty baǵasyn berýi tıis.
