Terrakt oqıǵasynan keıin qazaqstandyq óner juldyzdarynyń ishinde «Mýzart» toby alǵashqylardyń biri bolyp, Aqtóbege arnaıy keldi. Tanymal top halyqtyń eńsesin kóterý úshin tegin konsert qoıyp ketti. Ortalyq saıabaqqa aǵylǵan aqtóbelikterdiń sanynda esep joq, - dep habarlaıdy Qamshy.kz NUR.KZ – ke silteme jasap.
«Qazaly otbasylarǵa qaıǵyryp kóńil aıtamyz. Jazyqsyz japa shekken jandardyń barlyǵyna sizdermen birge ekenimizdi bildireıik degen nıetimiz bar. Biz sizderdi jylatýǵa emes, jubatýǵa keldik, aǵaıyn. Táýelsizdigimizdiń 25 jyldyǵy qutty bolsyn! Barshamyzǵa tynysh memlekette ǵumyr keshýge násip etsin. Urpaqtarymyz adaspasyn, bolashaǵy jarqyn bolsyn! Kózimizden shyqqan jas tek qýanyshtyń jasy, qýanyshtyń tamshysy bolsyn degimiz keledi», – dedi Sáken Maıǵazıev.
Bes myńnan asa turǵyn «Mýzart» ánderine bıledi. Halyqtyń yqylasy sheksiz. Aq jaýlyqty analar, jastar, búldirshinder beıbit kúnniń ánderin tyńdady. Juldyzdy top 15 jyldyqtaryna arnalǵan konsertterin Aqtóbeden bastap jatqandaryn aıtty.
«Bıyl bizdiń topqa 15 jyl. Qýanyshymyzdy Aqtóbe qalasynan bastap jatyrmyz. Sizderdiń aq batalaryńyzdy alýǵa keldik. Eńselerińizdi kóterýge, jaqsylyqty, beıbitshilikti nasıhattaýǵa keldik. Islamǵa kir keltirip júrgen túrli aǵymdardan aýlaq bolaıyq. Ata-babalarymyz ter tógip jetken Táýelsizdigimizdi qurmetteıik»,- dedi “mýzarttyqtar”.
Konsertke Berdibek Saparbaevtyń ózi arnaıy kelip, «Mýzart» tobyna aqtóbelikterdiń atynan alǵysyn aıtty.
«Eldegi bolyp jatqan jaǵdaıǵa beı-jaı qaramaı, aqtóbelikterdiń kóńilin kóterýge kelgen sizderge rahmet. Keshegi oqıǵadan keıin bul jigitterdiń ózderi «Aqtóbe jurtyna tegin konsert jasaıyq» degen usynys jasady. «Halyqtyń kóńilin kótereıik, qasynda bolaıyq» degenderi bizdiń, eldiń mereıin ósiredi. Sondyqtan sizderdiń attaryńyzdan osy topqa shyǵarmashylyq tabys tileımiz. Memleketimizdiń abyroıyn arttyra berińizder. Elimizde tynyshtyq, bereket bolsyn. Ár otbasy balalaryna jaqsy tárbıe, bilim berse, bizde tynyshtyq ta, bereket te, abyroı da bolady», – dedi Aqtóbe qalasynyń ákimi Berdibek Saparbaev.
