Álemniń barlyq JOO úshin bilim berý naryǵynda halyqaralyq dárejede moıyndalý men tabysty básekege qabilettilik ýaqyt ótken saıyn erekshe mánge ıe bolyp keledi. Jetekshi ýnıversıtetterdiń dárejesi eń aldymen halyqaralyq reıtıńterde anyqtalady. Qazaqstan Respýblıkasy Prezıdentiniń jarlyǵymen 2020 jylǵa deıin Qazaqstannyń kem degende eki joǵary oqý orny álemniń eń úzdik ýnıversıtetteriniń qataryna qosylý mindeti qoıyldy. Ál-Farabı atyndaǵy QazUÝ az ǵana ýaqyt ishinde álemdik bilim berý reıtıńterinde qarqyndy alǵa jyljyp, halyqaralyq QS (Ulybrıtanıa) reıtıńiniń kórsetkishi boıynsha úzdik-300 ýnıversıtetterdiń qataryna endi.
Ál-Farabı atyndaǵy QazUÝ-dyń halyqaralyq QS (Ulybrıtanıa) reıtıńindegi jetistikteri alys-jaqyn shetelderdegi kóptegen ýnıversıtetterdiń qyzyǵýshylyǵyn arttyryp otyr. Sheteldik áriptesterdiń resmı is-sapary soǵan dálel. Reseıdiń Ońtústik Oral memlekettik ýnıversıtetiniń rektory Aleksandr Shestakovtyń basshylyǵymen kelgen delegasıa ókilderi QazUÝ-dyń nátıjege baǵyttalǵan basqarý (NBB) qyzmetin joǵary baǵalady. Atalmysh júıe negizinde oqytýshylar men qyzmetkerlerdiń jumysyn reıtıńtik baǵalaýda taza tártip ornatylǵan. Ol ýnıversıtettiń halyqaralyq reıtıńte joǵary kórsetkishke qol jetkizýine aıtarlyqtaı áser etti.
«Bizdiń maqsatymyz áli de keń etek jaıatyn Eýrazıalyq ekonomıkalyq odaq aıasynda ózara yntymaqtastyqty damytý. Ýnıversıtetpen tanysqannan keıin, QazUÝ – Eýropa elderinde teńdesi joq, keremet stýdenttik ortalyq pen kampýs dep aıta alamyn. QazUÝ fenomeni, onyń saıasaty men endigi eki joǵary oqý oryny arasyndaǵy múmkindikter men ózara tıimdi áriptestik ornatý bizdiń ýnıversıtetterdi damytýǵa baǵyttalǵan sátti qadam», – dedi Ońtústik Oral memlekettik ýnıversıtetiniń rektory Aleksandr Shestakov.
Ál-Farabı atyndaǵy QazUÝ rektory Ǵalymqaıyr Mutanov óz kezeginde birlesken jumystyń múmkindikteri men birinshi kezekte oryndalatyn isterdiń tizimin aıqyndady. «Eýrazıalyq ekonomıkalyq odaq aıasynda búginde QazUÝ 119 kelisimshart negizinde Reseı Federasıasynyń kóptegen joǵary oqý oryndarymen yntymaqtastyq qarym-qatynas ornatqan. Kelesi jyly «EKSPO-2017» kórmesinde «Keleshektiń energıasy» basty taqyryptardyń biri bolmaq. QazUÝ BUU-nyń «Akademıalyq yqpaldastyq» baǵdarlamasynyń Jahandyq Haby bolǵandyqtan, atalmysh kórmede jasyl ekonomıka jáne qaıta qalpyna keletin energıa kózderi baǵytynda jasalǵan birlesken jobalardy kórsetý qoǵam úshin ózekti ári qyzyqty bolady», - dep atap ótti QazUÝ rektory. Kezdesý sońynda eki jaq «Jylýenergetıka» mamandyǵy boıynsha qosdıplomdy bilim berý baǵdarlamasy aıasynda kelisimge qol qoıdy. Sonymen qatar til úırený, sonyń ishinde qazaq tili men aǵylshyn tilin jetildirý maqsatynda sheteldik stýdenttermen almasýǵa kelisip, birlesken jańa jobalardy qolǵa alý máselelerin talqylady.
Anyqtama úshin:
Ońtústik Oral memlekettik ýnıversıtetiniń negizi 1943 jyly 2 qarashada Chelábınsk mehanıko-mashına qurastyrý ınstıtýty bolyp qalanǵan, 1951 jyly Chelábınsk polıtehnıkalyq ınstıtýty, al 1990 jyly Chelábınsk memlekettik tehnıkalyq ýnıversıtet bolyp qaıta qurylǵan. 1997 jyldan beri Ońtústik Oral memlekettik ýnıversıteti retinde qyzmet atqaryp keledi.
2008 jyly ýnıversıtette qoldanbaly jáne fýndamentaldy zertteýlerdi modeldeý úshin Sýperkompúter ortalyǵy ashyldy. Búginde Ońtústik Oral memlekettik ýnıversıtetinde álemniń eń qýatty TOP500 kompúterler reıtıńinde 348-orynǵa jaıǵasqan «Tornado IýÝrGÝ» sýperkompúteri qoldanylýda. 2010 jyly Ońtústik Oral memlekettik ýnıversıtetine Ulttyq zertteý ýnıversıteti kategorıasy taǵaıyndaldy.
2015 jyldyń qazan aıynda ýnıversıtet 5-100 jobasyna qatysý úshin iriktelgen alty joǵary oqý orynnyń tizimine endi. Atalmysh jobanyń maqsaty jetekshi reseılik ýnıversıtetterdiń jahandyq naryqta bilim berý qyzmeti men zertteý jobalarynnyń básekege qabilettiligin barynsha arttyrý.
