«Asqar Jakýlın atyndaǵy qaıyrymdylyq qory» qaterli naýqastarǵa, onyń ishinde balalar emhanalaryna qaıyrymdylyq jasaýdy daǵdyǵa aınaldyrǵan bolatyn. Osy joly qaıyrymdylyq qory Almaty qalasyndaǵy «Onkologıa jáne Radıologıa Qazaq Ǵylymı Zertteý Instıtýty» ortalyǵynyń balalar bólimine bardy. Barǵanda da balǵyn balalyq shaǵynda batpandaı aýrýǵa jolyqqan balalardyń kóńilin aýlap, ómirge degen úmitin oıatyp, aýyr syrqatpen kúresýge jiger beretin jyly kóńilimen bardy, - dep habarlaıdy Qamshy.kz.
«Asqar Jakýlın atyndaǵy qaıyrymdylyq qory» balalar bóliminiń meńgerýshisi Bykovskaıa Anna Nıkolaevnanyń ótinishimen, balalar bólimine otyzǵa jýyq sapaly jınalmaly tósek jáne kórpe jastyq jıyntyǵyn syılap, onyń ústine eki júz sharshy metr oıyn alańyna sońǵy úlgidigi tósenish jatqyzyp berdi. Shara barysynda qor ókilderderine dárigerler de, ata-analar da sheksiz rızalyqtaryn bildirdi.
Jalpy quny eki jarym mıllıon teńgege baǵalanǵan syılyqtardy tabystaý rásimine aqyn, Qazaqstannyń mádenıet qaıratkeri Almas Ahmetbekuly, qor dırektory Gúlnar Seıdolla, sondaı-aq qordyń qamqorshylar keńesiniń múshelerimen birge Asqardyń qyzy Aıdana Jakýlına da qatysyp, balalarǵa jiger qaırat bere sóılep, qordyń maqsattarymen tanystyrdy.
Almas Ahmetbekuly osy jyldyń aqpanynda dúnıeden ozǵan Asqar Jakýlın týraly syr sherte kele, búginde qor qyzmetkerleri qamqorlyqqa eń muqtaj emdeý mekemeleri men kómekke zárý balalardy ózderi izdep taýyp, qoldaý kórsetip jatqanyn aıtsa, Asqardyń qyzy Aıdana jazdyq demalys kezinde qor jumysyna aralasyp júrgenin, bundaı syrqatpen kúresý syrqat adamǵa da, onyń janashyrlaryna da qandaı rýhanı salmaq túsetinin ákesiniń syrqatynan bilgenin jetkizip, syrqat balalarǵa jiger bere sóıledi.
Balalar bólimi meńgerýshisiniń mindetin ýaqytsha atqarýshy joǵarǵy sanatty dáriger Tohmoldaeva Qarlyǵash Altynbekovna hanym aýrýhana men naýqas balalardyń jaıyna toqtalyp: Balalardyń saýyǵý kórsetkishi jaqsaryp kele jatqanyn osy qordyń birinshi maýsym "Balalar qorǵaý meıramy" kúnine uıymdastyrǵan kóńil kóterý sharalary jáne búgingi is-sharasy syrqat balalar men olardyń ata-analaryna úlken qoldaý ekenin aıtyp, Asqar Jakýlınniń otbasyna amandyq tilep zor rahmetin jetkizdi. Al sol aýrýhanada jatqan Aısýltannyń ájesi Ahmetova Baný apa qorǵa degen alǵysyn bildire kelip, Asqar Jakýlınniń otbasyna kóńil aıtty.
Qor jetekshisi Gúlnar Seıdolla hanym sózinde, - «Asqar Jakýlın atyndaǵy qaıyrymdylyq qorynyń» basty maqsaty - aýrýǵa shaldyqqan adamdar ishindegi eń qorǵansyz bóligi – balalarǵa kómek kórsetý bolyp tabylady. Qor múmkindiginshe eń qaterli aýrýlarmen aýyratyn balalarǵa em alýǵa ne sondaı aýrýlardyń aldyn alý sharalaryna qoldaý kórsetedi,- dedi.
«Asqar Jakýlın atyndaǵy qaıyrymdylyq qory» osy jyldyń naýryzynda Asqardyń jary Jaına Jakýlına hanymnyń bastamasymen qurylyp memlekettik tirkeýden ótken bolatyn.
