Osydan 74 jyl buryn tusaýy kesilgen sóz zergeri Ǵabıt Músirepovtiń «Aqan seri – Aqtoqty» tragedıasy M.Áýezov atyndaǵy Qazaq memlekettik akademıalyq drama teatrynda kórermen qaýymmen qaıta qaýyshpaq. Alǵash qarashańyraq teatrda 1942 jyly sahnalanǵan týyndy 1980 jyldarǵa deıin teatr repertýarynan túsken joq, ár kez óz kórermenin taýyp, qoldaý-qoshemetterine bólenip otyrdy. Búginde araǵa qyryq jyldaı ýaqyt salyp tragedıany jańasha kózqaraspen, zamanaýı, eýropalyq stılde rejıser Qýanyshbek Adylov sahnalamaq. Al talasy kóp, taǵy bir Aqan seri, Aqtoqty beınelerin oınaý tek ónerde oza shapqan, táleıi bar talanttyń ǵana baǵyna buıyratyny belgili. Bul rette teatr sahnasynda sal-serilerdiń padıshasy, aqıyq aqyn Aqan seriniń beınesin oınaý Qazaqstan "Serper" Jastar odaǵy syılyǵynyń laýreattary Erkebulan Daıyrov pen Almas Shaıahmetovke tapsyrylsa, Aqan ánderi men kúıleriniń arqaýyna aınalǵan arý Aqtoqty rolderin Qazaqstan "Serper" Jastar odaǵy syılyǵynyń laýreaty Lázzat Qaldybekova men aktrısa Janel Maqajan oınaıdy. Osyǵan oraı qoıylymnyń premerasyna daıyndalyp jatqan shyǵarmashylyq toptyń jumys barysymen tanysyp qaıtqan edik.
Janel Maqajan, aktrısa:
Aqtoqty - árbir aktrısanyń armany jáne meniń M.Áýezov teatrynyń akterlik quramyna qabyldanǵaly enshime tıgen alǵashqy basty rolim. Osyǵan deıin kınosalasynda óner kórsetkendikten, qarashańyraqtyń kıeli sahnasynda Ǵ.Músirepovtiń "Aqan seri - Aqtoqty" tragedıasynda Aqtoqty rolin oınaý - men úshin úlken mártebe jáne jaýapkershilik. Búginde óz keıipkerimdi sátti alyp shyǵý úshin rejıserdiń talabyna saı jumys isteýge tyrysyp jatyrmyn.
Murat Nurásilov, Qazaqstannyń eńbek sińirgen qaıratkeri:
"Aqan seri - Aqtoqty" tragedıasyn mektep qabyrǵasynda oqyp júrgen kezimde kórgem. Sol kezde emis-emis esimde qalǵany Aqtoqty rolin Sholpan Jandarbekova apamyz, al búginde meniń enshime tıgen Qońqaı rolin qazaq teatrynyń alǵashqy irgetasyn qalaýshylardyń biri, Uly Serke Qojamqulov babamyz oınaǵan. Negizi Qońqaı akter retinde oń jambasyma kelgen úlken rol. Árıne, kásibı akter bolǵandyqtan, rol unady, unamady, úlken, kishi dep bóle almaımyn, dese de maǵan mundaı beıne birinshi ret berilip tur. Keıipkerimniń óz basyna kelsem, bul - "kishkentaı adamnyń tragedıasy" (tragedıa malenkogo cheloveka). Jalǵyz qyzy Aqtoqty. Eldiń sózine eretin de, qyzyn súıgeninen aıyratyn da, artynan ah uryp, oıbaılap qalatyn da ákesi. Pesanyń sújeti boıynsha ol - aıtatyn sózderi de, júris-turysy da kúlkili keıipker. Biraq, shyn máninde, bul - tragedıa. Buryn da, búgin de ómirimizden oryn alyp kele jatqan tragedıa. Al spektáklge kelsem, qoıylym sátti shyǵady degen oıdamyn, al qalǵanyn sahna kórsetedi, baǵasyn halyq aıtady.
Qaırat Nábıolla, akter:
Maǵan usynylǵan rol - Serdáli beınesi. Ol da Aqan sıaqty aqyn ári seri. Alaıda, qyzǵanshaq, kúnshil, ishi tar keıipker. Aqanda ne bar, sonyń bárin qyzǵanady, tipti Aqtoqtyny da. Adamdardy bir-birine aıdap salyp, Aqanǵa qarsy qoıady. Oǵan satqyndyq jasaıdy. Óıtkeni Aqan bar jerde ol eshkim emes. Sondyqtan onyń kózdegeni - Aqandy elden qýyp shyǵyp, eldiń aqyny men serisi ózi bolý. Jalpy men úshin akter retinde óte qyzyqty rol.
Daıyndaǵan Móldir BEKJAN
