Qaraǵandy oblysynda Sibir jarasyn juqtyrdy degen kúdikpen aýrýhanaǵa jatqyzylǵandar sany artyp otyr, - dep habarlaıdy Qamshy.kz.

Dárigerler oblystyń Shet aýdanynda jeti turǵynnyń ınfeksıalyq aýrýhanaǵa jatqyzylǵanyn, ekeýiniń ótken túnde kóz jumǵanyn habarlady.

«20 maýsym kúni Qaraǵandynyń ınfeksıalyq aýrýhanasyna Shet aýdanynan jeti adam ınfeksıalyq aýrý juqtyrdy degen kúdikpen jetkizilgen. Naýqastardyń jasy 23-50 jas aralyǵynda boldy. Jetkizilgenderdiń ekeýi ınfeksıalyq shok jaǵdaıynda bolǵan. Túnde ol ekeýi qaıtys boldy», - deıdi Qaraǵandy oblystyq densaýlyqsaqtaý basqarmasynyń baspasóz hatshysy Aıjan Isa.

Qaıtys bolǵandardyń biri 33 jastaǵy áıel, ekinshisi – 50 jastaǵy er kisi. Qazir ınfeksıonıst dárigerler naýqastardyń dıagnozyn anyqtaý sharalaryn júrgizýde.

«Bakterıologıalyq zertteýler bir-eki táýlik ishinde daıyn bolady. Osynyń negizinde aqyrǵy dıagnoz qoıylady. Qazir Shet aýdanynda sanıtarlyq-epıdemıologıalyq sharalar júrgizilýde. Veterınarlyq qyzmet jumys istep jatyr», - deıdi A. Isa.

Buǵan deıin Shyǵys Qazaqstan oblysy Jarma aýdanynda da eki adamnyń Sibir jarasyn juqtyrdy degen kúdikpen aýrýhanaǵa jatqyzylǵany habarlanǵan bolatyn.