Elbasy Nursultan Nazarbaev «Rossıa 24» telearnasyna suhbat berip, Qazaqstan men Reseı áriptestigi, Táýelsiz memleketter dostastyǵynyń róli jaıly oılarymen bólisti, - dep habarlaıdy Qamshy.kz.
Prezıdent suhbat barysynda TMD-nyń qurylý tarıhyna toqtaldy.
«Tarıhty, Almatyda TMD qurylǵan 21 jeltoqsandy eske túsirý kerek. Belovej jıyny bolǵanda slaván elderi birige bastady, Qazaqstanmen, Orta Azıamen, Kavkaz elderimen birlesý máselesi týdy. Belovej kelisiminiń músheleri ne bolady, qalaı bolady dep ýaıymǵa salyndy. Osy jerde Túrkistan odaǵyn qurý týraly da sóz shyqty. Kavkaz elderiniń óz oılary boldy. osyndaı jaǵdaıda men barlyǵymyz áriptestik quraıyq degen usynys tastadym. Óıtkeni, ol kezde «odaq» degen sózge jurt qyzyl kórgen buqadaı qaraıtyn. Almatyda sol dostastyqty qurdyq», - dep eske aldy sol kúnderdi N. Nazarbaev.
Alaıda, N. Nazarbaevtyń aıtýynsha, barlyǵy josparlanǵandaı bolmaı shyqqan.
«Bizdiń ortaq qorǵanys keńistigimiz, erkin saýda-sattyq, adamdardyń emin-erkin júrip-turýy bolady jáne biz ortaq qundylyqtardy qorǵaımyz degen úmit bolǵan. Biraq, barlyǵy basqasha boldy. biz qalaǵandaı bolmady. Barlyq elder egemendigin alǵan soń ony nyǵaıtýǵa tyrysty. Árkimniń óz ıdeıasy boldy, árkim óz jolymen ketti. Sóıtip, bul uıymnyń da tigisi sógile bastady. Birlesken jumystar kún ótken saıyn báseńdeı berdi. Tipti, ózimiz qabyldaǵan kóptegen qujattardy eshqaısymyz oryndamaıtyn jaǵdaıǵa keldik. Bireýler qol qoıdy, bireýler qol qoımaı otyrdy, sóıtip jaýapkershilik alýdan bas tartty. Mundaı jaǵdaıda qandaı uıym bolady? Ol qalaı jumys isteıdi? Osyny men únemi ýaıymdap júretinmin. Biraq, TMD-nyń qurylǵany jaqsy boldy dep sanaımyn. Birinshiden, bizdiń beıbit taraýymyz úshin. Ekinshiden, bul prezıdentter kezdesetin alań boldy. óıtkeni, bóliný júrip jatqanda shekarada adamdar arasynda túrli jaǵdaılar oryn alyp jatty. Bir otbasynyń músheleri shekaranyń arǵy betinde, biri bergi betinde qalyp jatty. Bireýler Máskeýde oqyp jatsa, balalary osynda turyp jatty. Osyndaı adamı máselelerdi sheshýde kóptegen suraqtar týdy. TMD memleket basshylary bas qosyp, pikir almasatyn alań boldy, bir-birimizge qaraýymyzdyń ózi mańyzdy bolatyn», - deıdi Elbasy.
Prezıdent suhbat barysynda TMD-dan bólek, Eýrazıalyq ekonomıkalyq odaq, postkeńestik keńistiktegi saıası-ekonomıkalyq ahýalǵa baılanysty da oılarymen bólisken.
