Qazaqstan táýelsizdigin alǵan ýaqyttan beri bılik tizginin ustaǵan qanshama sheneýnik jemqorlyǵy úshin sottaldy. Tipti, kóbisiniń aty-jónderi de qazir eshkimniń esinde emes. Biraq, jurt eks-premer Serik Ahmetovke "obal boldy" degendi jıi aıtady. Oǵan taǵylǵan aıyptar sotta dáleldense de, halyqtyń kóbi sengisi kelmeıtini jasyryn emes, - dep jazady SN.kz. Bul týraly Qamshy.kz habarlaıdy.
Bılik mańaıynda júrgen uzynqulaqtarǵa sensek, 8 jylǵa sottalǵan Serik Ahmetov bıyl kúzden qalmaı aqtalyp, bostandyqqa shyǵady-mys. Buǵan QR Prezıdenti ákimshiligin basqarǵan Nurlan Nyǵmatýlınniń qyzmetten ketýi sebep bolǵan kórinedi. Ras-ótirigi belgisiz, Ahmetovtiń sottalýyna búgingi Májilis spıkeriniń qatysy bolǵan deıdi taǵy sol uzynqulaq. Mundaı áńgimeni tipti, sot bolyp jatqan kezde keıbir qoǵam belsendileri de aıtyp júretin. Endi qyzmetten ketip, yqpaly álsirese kerek, Ahmetovke taǵylǵan temir qursaý bosaı bastapty. Estýimizshe, eks-premer jaqyn kúnderi "úlken kisiniń" ózimen kezdesip, keshirimin alǵan da kórinedi.
Osy rette aıta ketý kerek, Serik Ahmetovtiń sot prosesi júrip jatqan tusta otandyq BAQ ókilderiniń kóbi atalǵan taqyrypta mán-maǵynasy men mazmuny birdeı aqparattyq materıaldar jarıalap otyrdy. Bul materıaldardy ádette QR Prezıdenti janyndaǵy Ortalyq komýnıkasıalar qyzmetiniń mamandary jiberip otyratyn deıdi jýrnalıs áriptester. Iaǵnı, Ahmetovke qarsy aqparattyq shabýyl joǵary jaqtan uıymdastyrylǵan bolýy múmkin.
Jalpy, Nyǵmatýlınniń esimin tek Ahmetovtiń isimen ǵana emes, EKSPO jáne kásipker Qaırat Jamalıevtiń isterimen baılanystyratyndar da bar. Bul da árıne, jaı alyp-qashpa sóz bolýy múmkin, kózben kórip, qolmen ustap alǵan eshkim joq. Biraq, "Astana EKSPO-2017" ulttyq kompanıasynyń eks-tóraǵasy Ermegıaevtiń sottalýy aldyn ala josparlanǵan is degen boljam aıtylsa, Jamalıevti otbasylyq daýdyń qurbany deıtinder bar. Óıtkeni, Ermegıaev isi týraly da mazmuny birdeı materıaldardy otandyq BAQ betterinen jıi baıqadyq.
Deı tura, Nyǵmatýlın qyzmetin aýystyrsa da yqpalynan aırylǵan joq deıtinder de az emes. Al, bul boljamdardyń qanshalyqty ras-ótirik ekenin aldaǵy kúzde biletin bolamyz.
Áýes Marhabaev
