Shyǵys Qazaqstan oblysynyń ákimi Danıal Ahmetov oblystyq İshki ister departamentine arnaıy baryp, jeke qurammen kezdesip, qaza bolǵan ishki ister organdarynyń qyzmetkerlerine arnalǵan stelaǵa gúl shoqtaryn qoıý rásimine qatysty, - dep habarlaıdy Qamshy.kz.
Aımaq basshysy SHQO İİD qyzmetkerlerine nátıjeli jumystary úshin, óńirdegi tártip, qyzmettik mindetterin oryndaý barysyndaǵy kásibı sheberlikteri men erlikteri úshin alǵysyn bildirdi.
– Otanǵa adal qyzmet etý jolyndaǵy eńbekterińiz úshin shyn kóńilimnen alǵys aıtqym keledi. Sizder basty qundylyǵymyz – halqymyzdyń tynyshtyǵyn qorǵap kelesizder. Memleketke tártip, tynyshtyq pen qaýipsizdik qajet. Biz sizderdiń elge degen adaldyqtaryńyz, Prezıdentimizdiń tapsyrmalaryn buljytpaı oryndaıtyndyqtaryńyz úshin qurmetteımiz. Jas urpaqqa bergen tálim-tárbıe úshin ardagerlerge de alǵysymdy bildiremin. Qazaqstan polısıasy kúnimen, - dedi Danıal Ahmetov. – Bizde urpaqtar sabaqtastyǵy bar. Jaqynda Aqtóbede bolǵan oqıǵalarda ishki ister departamentiniń qyzmetkerleri aldyńǵy shepte turyp, Otan aldyndaǵy boryshtaryn joǵary abyroımen atqarǵandyǵyn kórdik.
Respýblıka Táýelsizdiginiń 25 jylynda Shyǵys Qazaqstan oblysy ishki ister departamentiniń 41 qyzmetkeri qyzmettik paryzyn óteý barysynda kóz jumyp, 11-i erlikpen qaza tapqan. Kóbisi qaza bolǵannan soń memlekettik jáne vedimistik nagradalarmen marapattalǵan. Qaıtys bolǵan polısıa qyzmetkerleriniń otbasylaryna SHQO İİD tarapynan materıaldyq jáne basqa da kómek túrleri kórsetiledi.
– Otanǵa qyzmet etý jolynda, qaza tapqan jandardy biz umytqan joqpyz, - dedi Danıal Ahmetov gúl shoqtaryn qoıý barysynda erlikpen qaza bolǵan polısıa qyzmetkerleriniń jubaılaryna.
– Oblystyń ishki ister organdary ardagerleriniń atynan polıseılerge degen erekshe nazar men kómekterińiz úshin úlken alǵysymdy bildirgim keledi. Keńes Úkimeti kezinde bizde 100 adamǵa bir jeńil jáne bir júk kóligi bolatyn. Tapsyrmalarǵa jaıaý baratynbyz. Al, qazir zaman ózgerdi. Jumys isteý úshin barlyq jaǵdaı jasalǵan, - dedi SHQO ishki ister organdarynyń jáne Ulttyq Gvardıanyń ardagerler Keńesiniń tóraǵasy Nurlybek Úderbaev oblys ákimimen kezdesý barysynda.
Baǵdarlama sońynda aımaq basshysy Óskemen qalasynyń İİB jedel basqarý Ortalyǵynyń jumysymen tanysty.
Aıta ketsek, jyl basynan beri ishki ister organdarynyń qyzmetkerleri 6 myńnan astam qylmystyq oqıǵany ashqan, 35 qylmystyq top zańdy jaýapkershilikke tartyldy, 258 esirtki qylmysy anyqtalǵan. Polısıanyń kúshimen 6,3 myń qylmystyq is aıaqtalǵan.
