Qazaqstanda qoǵamdyq densaýlyq saqtaý qyzmeti qurylady. Jańa qyzmet sanıtarlyq-epıdemıologıalyq qyzmet, salaýatty ómir salty qyzmeti men tamaqtanýdy ońtaılandyrý salasyn biriktiredi. Bul týraly qoǵamdyq keńes aldynda esep bergen QR Densaýlyq saqtaý jáne áleýmettik damý mınıstri Tamara Dúısenova málimdedi, - dep habarlaıdy Qamshy.kz  BNews.kz – ke silteme jasap.

«Qazirgi tańda mınıstrlik aldynda qoıylǵan mindet – basqarýdyń jańa júıesin qurý. Bul degenimiz – jıi aýyratyndar arasynda ǵana emes, saý adamdar arasynda da aýrýdyń aldyn alý jumysy. Osyǵan baılanysty baǵdarlamada 2 baǵyt qarastyrylǵan. Birinshi baǵyt – qoǵamdyq densaýlyq saqtaý qyzmetin qurý. 2014 jyldyń sońynda biz «Salamatty Qazaqstan»  baǵdarlamasynyń júzege asý barysy jóninde vedomstvo men basqa memlekettik organdardyń jumysyn baǵalaý úshin Dúnıejúzilik bank sarapshylaryn tartqan bolatynbyz. Atalǵan bank qoǵamdyq densaýlyq saqtaý qyzmetine qatysty usynystar jasap, problemalardy da anyqtady», - deıdi T.Dúısenova.

Mınıstrdiń aıtýynsha, bank sanıtarlyq-epıdemıologıalyq qyzmettiń (SEQ) densaýlyq saqtaý júıesinen bólinýi jaqsy nátıje bermegenin anyqtady. Búgingi tańda SEQ fýnksıasyna keń taraǵan aýrýlardy tirkeý ǵana kiredi. Iaǵnı, olar monıtorıń pen jospar jasap, aýrýlardyń aldyn almaıdy. Osyǵan oraı, jańadan qurylatyn qyzmet SEQ, salaýatty ómir salty qyzmeti men tamaqtanýdy ońtaılandyrý salasyn biriktiredi. Qyzmettiń mindetterine qaýipterdi anyqtaý, halyqty aqparattandyrý, aýrý týyndaýynyń bastapqy sebepteri men zardaptaryn anyqtaý kiredi.