Erasyl Áýbákirovtiń ólimi boıynsha iste kúdikti Aıan Meıirbaev kepilaqymen bosap shyqty, - dep habarlaıdy Qamshy.kz Tengrinews.kz -ke silteme jasap.

"QR İİM tergeý departamenti, naqtyraq aıtqanda tergeý tobynyń jetekshisi Dúmshebaev A. Meıirbaevty qamaýda ustaý túrindegi bultartpaý sharasyn alyp tastady. Qazirgi ýaqytta Meıirbaev A. qylmystyq is boıynsha kúdikti", - dep habarlady Astana prokýrorynyń orynbasary Baısholaqov.

Qylmystyq is boıynsha sotqa deıingi tergeý jalǵasyp jatyr. Prokýratýradaǵylar qylmystyq istiń ózge mán-jaıynyń tergeý múddesine baılanysty jarıa etilmeıtinin málimdep otyr. 
Sondaı-aq, İİM resmı ókili Almas Sádýbaev Aıan Meıirbaevqa qatysty qylmystyq qýdalaý toqtatylǵanyn málimdedi. 

"2016 jyldyń 7 mamyrynda Astananyń prokýratýrasy Meıirbaevqa qatysty Qylmystyq kodekstiń 163-babynyń tártibinde qamaýǵa alý túrindegi bultartpaý sharasy alyp tastaldy. Ol bosatyldy", - dep málimdedi Sádýbaev.

İİM málimetinshe, Meıirbaevqa qatysty qylmystyq qýdalaý onyń áreketterinde qylmys quramynyń joqtyǵyna baılanysty toqtatylǵan.
Eske salaıyq, 23 jastaǵy Erasyl Áýbákirovtiń zorlyq belgileri bar máıitin polıseıler 10 aqpanda tapqan bolatyn. Kisi óltirdi degen kúdikpen tórt adam ustaldy. Erasyl Áýbákirov elordadaǵy medısınalyq ýnıversıtettiń altyn kýrsynyń stýdenti edi. Ol 3 aqpanda úıinen shyǵyp ketip, qaıta oralmaǵan. Kelesi kúni onyń joǵalǵany jaıly habardy dostary taratty.