Ystambuldaǵy Atatúrik halyqaralyq áýejaıynda qatarynan birneshe jarylys boldy. Naqtylanǵan málimet boıynsha 36 adam qaza bolyp, 147 adam jaralanǵan. Jarylysty «Islam memleketi» lańkestik toby uıymdastyrǵan, - dep habarlaıdy Qamshy.kz BNews.kz-ke silteme jasap.

28 maýsym keshkisin túrkıalyq BAQ-ta Túrkıanyń iri áýejaıynda eki jarylys bolǵany týraly habar tarady. Jarylystan soń kýágerler termınal ǵımaratynan qashyp bara jatqan qarýlanǵan tórt adamdy baıqap qalǵan. Jarylys áýejaıdyń kireberisinde, shyǵatyn jolda jáne kólik turaǵynda bolǵan.

«Munyń barlyǵyn DAISH-tyń (Qazaqstanda tyıym salynǵan lańkestik uıym - red.) uıymdastyrǵany baıqalady, tekserý jalǵasyp jatyr», - dedi Túrkıanyń Premer-mınıstri Bınalı Iyldyrym.

Jarylystan soń áýejaıdyń kólik turaǵynda atys bolǵan delinedi. Túrkıa bıligi oqıǵany terakti dep baǵalady.