Qaraǵandyda taǵy bir adam kúıdirgi dertin juqtyrdy degen kúdikpen aýrýhanaǵa tústi. 24 jastaǵy jigit Qaraǵandy medısınalyq ýnıversıtetiniń 5 kýrs stýdenti eken. Emdeý mekemesinde tájirıbeden ótip júrgen ol naýqasty qaraýǵa qatysypty, dep habarlaıdy Qamshy.kz KTK arnasyna silteme jasap.
Odan alynǵan synamalar saraptamaǵa jiberilgen. Al karantın jarıalanǵan Erkindik aýlynda taǵy bir sıyr aram qatty. İri qara kesel juqtyrdy ma álde zalalsyzdandyratyn dárilerden ýlandy ma, sony qazir veterınarlar anyqtaýda. Jalpy, dert oshaǵy –Erkindikte aýrý juqtyrǵandarmen baılanysta bolǵan 73 adam dárigerlerdiń baqylaýynda. Aýylda zalalsyzdandyrý sharalary da úzilissiz júrip jatyr. Mamandar aýrý taratýy múmkin dep 47 qańǵyǵan ıt pen mysyqty ustap órtep jibergen. Al aram ólgen taıynshanyń denesinen synamalar alynyp, arnaıy saraptamaǵa jiberilipti.
-Dárini qorajaıdyń aınalasyna jasaǵanda onyń janynda shópter ósip turýy múmkin. Sodan ýlanǵan shyǵar degen de qaýip bar. Biraq eshqandaı klınıkalyq belgileri joq. Sibir jarasy, kúıdirgide maldyń denesi bosańsıdy. Al munda táni qatty, aýrý maldyń ózine tán klınıkalyq sebepteri joq, - deıdi Veterınarlyq baqylaý komıtetiniń Qaraǵandy oblysy boıynsha ıspeksıasynyń jetekshisi Marat Muhtarov.
