Almaty qalasynyń ákimi Baýyrjan Baıbek aryqtar júıesiniń buzýlyýyna kásipkerlerdi kinálap otyr, - dep habarlaıdy Qamshy.kz KTK arnasyna silteme jasap.
Almatyny sý basyp qala beretinine qatysty Úkimet basshysynan eki márte eskertý alǵan qala ákimi búgin aryq máselesin keńinen qozǵady. Málimet boıynsha, sońǵy 6 jylda nebári 113 shaqyrym aryq jóndeýden ótken. Al onyń jalpy uzyndyǵy 1200 shaqyrymnan asady. Týra osyndaı qarqynmen jumys júrgizilgen jaǵdaıda ol bir ǵasyr ýaqytty alýy múmkin. Bul jerde qarjy tapshylyǵy da qolbaılaý ekenin aıtqan Baýyrjan Baıbek qolastyndaǵylarǵa aryq júıesin retteýge aqshany únemdep jumsaýdy tapsyrdy.
Baýyrjan Baıbektiń qabyldaý bólmesiniń aldynda onyń orynbasarlary, basqarma basshylary men aýdan ákimderi jınaldy. Árıne, aýdan basshylary erekshe qojaljyp tur. Sebebi árbir jaýynnan soń sý basqan úılerden túsetin shaǵym azaıar emes. Búgingi jıynda aryq máselesi erekshe aıtyldy. Al osy salada atqarylyp jatqan jumys qarqyny tym baıaý eken.
Erlan Áýkenov, Almaty qalasy ákiminiń orynbasary:
-Týra osyndaı qarqynmen jumys júrgizetin bolsaq aryq júıesin tolyq jóndeýden ótkizip, jańalaryn júrgizý úshin 100 jyl da jetpeıdi.Qazirgi kúnge deıin jaýyn sýy aǵatyn arnaıy júıe joq. Bul júıeniń qaıda ekenin tabýdyń ózi qıynǵa soqpaq.
Sheneýnikter 3 aı boıy uzyndyǵy 1200 shaqyrymdy quraıtyn aryqtardyń barlyǵyn tekserip shyqqan. Sońǵy 6 jylda onyń nebári 113 shaqyrymy ǵana jóndeýden ótipti. Al qalǵan bóliginiń jaǵdaıy kóńil kónshitpeıdi. Sebebi, jańadan qosylǵan aımaqtarda aryq ataýly múldem joq, al saýda úıleri bar júıeniń tas-talqanyn shyǵarypty.
Baýyrjan Baıbek, Almaty qalasynyń ákimi:
-Joldy jóndep, barlyǵyn asfáltpen jaýyp tastaıdy. Bul sáýlet jáne qurylys basqarmasynyń kánási. Olar qurylystardy qadaǵalaýy kerek. Endi jeke kásipkerler óz olqylyqtaryn ózderi joısyn, búdjettiń aqshasy buǵan jetpeıdi.
Almatynyń aryq júıesin qalpyna keltirý úshin shamamen 4 mlrd teńge qajet eken. Árıne, búdjetten mundaı qarjyny alý ońaı emes. Al esep-qısapty teksermesten maquldaıtyn atqaminerlerdiń áreketi Baıbektiń ashýyn keltirdi.
–Ótken joly aýdan ákimderin suradym, qansha aqsha kerek ekenin ózderi bilmeıdi. Smetanyń ne ekenin túsinip otyrǵany da shamaly. Bul degen memlekettiń aqshasy emes pe?
Jaýyn sýlaryna arnalǵan júıeniń kartasyn josparlaýǵa taǵy 3 aı qajet eken. Al ol ýaqytqa deıin aryqtar qolǵa alynbaq. Qazirgi tańda olar qoqystan tazartylyp, jer-jerlerde tıisti jumystar bastalǵan.
Qala ishindegi aryqtardy jóndeý, qalpyna keltirý nemese jańadan júrgizý arzan dúnıe emes. Máselen dál mynandaı ashyq aryqtyń árbir metri keminde 11 myń teńge turady. Bul tek qana qajetti qurylys materıaldarynyń baǵasy. Al odan bólek atqarylatyn jumys quny bar. Sondyqtan búdjet aqshasy jetpegen jaǵdaıda nóser jaýynnan soń sý aryqpen emes, kóshemen aǵýy jalǵasa bermek. Sebebi, arnaıy jaýyn sýy quıylatyn arnalar tek josparda ǵana bar.
