Atyraý agrarly-tehnıkalyq kolejiniń burynǵy basshylary aqyly negizde oqýy tıis stýdentterdi grantqa aýystyrǵan kórinedi. Máselen, aımaq úshin tapshy sanalatyn veterınar mamandyǵyna bólingen grantta temirjolshylar, tońazytqysh jóndeýshilerdiń ornyna qurylysshylar bilim alýlary múmkin. Iaǵnı, memleket esebinen bólingen qarjyǵa aqyly negizde oqýy tıis stýdentterdi oqytyp, olarǵa stıpendıa taǵaıyndap kelýleri múmkin, - dep habarlaıdy Qamshy.kz 31 arnaǵa silteme jasap.

Balalary buǵan deıin grantta bilim alyp kelgen ata-analarǵa jańalyqty kolejdiń jańa basshysy aıtqan. Naqtysy, tálimgerlerdiń memleket esebinen zańsyz oqyp jatqandaryn jetkizgen. Endi balalarynyń tegin bilim almaıtyndaryn jáne bir jylǵy oqý aqysyn tólep, alǵan shákirtaqylarynyń da memleketke qaıtarylý qajet ekendigin eskertipti.

Álıa Imanǵalıeva, Ata-ana:

- Meniń balamnyń negizgi sabaǵy - búdjet, eshe stıpendıa alyp otyr, fevraldan beri stıpendıasy joq, eshe myna oqyǵandy aqshasyn tóleńder dep otyr.

Maıra Quspanǵalıeva, Ata-ana:

- Mine jyldyń aıaǵyna deıin jettik, jyldyń aıaǵyna deıin biz bárin sheshemiz, bul oblystyq búdjetten bólinip turǵan grant, oblys ákimi sheshedi bárin, bizder soǵan jumystanamyz dedi. Bul kisiler de jumystandy, bizder de jumystandyq, biraq eshqandaı da nátıje joq.

Atyraý agrarly-tehnıkalyq kolejine jýyrda  basshy bolyp kelgen Klara Muqashkereevanyń aıtýynsha, munyń bári burynǵy basshylyqtyń kezinde jasalǵan kórinedi.

Klara Muqashkereeva, Atyraý memlekettik agrarly-tehnıkalyq kolejiniń dırektory:

 - Jergilikti basqarýshy organdarǵa habarlama berdim, qazirgi kúnde oblystyq akımat tarapynan osy máseleni sheshý joldaryn oılastyryp jatyr, josparlap jatyr, al otyrǵan stýdentterdi sol otyrǵan mamandyǵy boıynsha búdjet etip bekitip berýge eshqandaı zańdylyq negiz qazirgi kúni joq.

Oqý ornyndaǵy bul máselemen qazir quzyrly oryndar aınalysyp jatqan kórinedi. Onda da belgili bir tulǵalarǵa qatysty emes, naqty derekter boıynsha. Tórt aıdan beri júrip jatqan tekseris qorytyndysynyń qashan shyǵary ázirge belgisiz.