Aqtaýda bir top áıeldiń jaǵa-jyrtys tóbelesi áleýmettik jeli qoldanýshylarynyń jaǵasyn ustatty.  Oıynshyqqa talasqan balalardan kem túspegen áıelderdiń bul áreketi ǵalamtorǵa  tarap, beınejazba bir táýliktiń ishinde 20 myń ret qaralǵan. Alaıda, bir-birin aıaýsyz soqqyǵa jyqqandardy  tártip saqshylary áli tapqan joq, dep habarlaıdy Qamshy.kz 31 arnaǵa silteme jasap.

Áıelderdiń kópshilik kózinshe jappaı tóbelesip, birin-biri aıaýsyz urǵany beınejazbaǵa jazylǵan. Jazǵandardyń ózderi jappaı tártipsizdikke kýá bolǵan er azamattar. Soraqysy, áıelder birin-biri súırep, tepkilep jatqanyn esh qymsynbastan uıaly telefondaryna túsirip, arasynda tártip saqshylaryn shaqyrtý kerektigine keńes te bergen daýystary túsipi qalǵan.

Tóbelesti sol jerde balmuzdaq satyp turǵan Daıana esimdi qyz óz kózimen kóripti. 

- Men qatty qorqyp kettim. Áıelder bir-birin óltirip ala ma dep oıladym. Bes áıel birge kele jatty. Olar ishimdik iship alǵanǵa uqsaıdy. Bir mezette kerise ketti. Tóbeles 20 mınýtqa sozyldy.  Keıin ishindegi bir áıel kólikke otyra bergende qalǵandary artynan qýyp bul jerden barlyǵy ketip qaldy, - deıdi Daıana Iakıbaeva.

Bireýge kúlki, bireýge taba bolǵan qazaq áıelderiniń jas shamasy 30-ben 40 aralyǵynda. Polıseıler ázirge eshkimdi tappaǵan.

- 02-ge eshqandaı qońyraý túsken joq. Jáne bul áıelder bir-birine aryzdanbady. İshki ister qyzmetkerleri soǵan qaramastan qoǵamdyq tártipti buzǵany úshin izdestirip jatyr, - deıdi MO İİD memlekettik til jáne aqparat bóliminiń basshysy Jazıra Ábil.

Qoǵamdyq narazylyq týǵyzǵan áıelderdiń tóbelesi kafelerdiń beınebaqylaý kameralaryna túsip qalýy múmkin. Sondyqtan tártip saqshylary olardyń naqty kim ekenderin durys anyqtaý úshin sol beınejazbalardy túgel tekserip, búgin anyqtaýǵa kiristi. Eger anyqtalsa, bul áıelder eki birdeı bap boıynsha jazaǵa tartylady.