Jýrnalısik zertteý kezinde Rýslan Kúlekbaevtyń Almaty oblysy İle aýdany Yntymaq aýylynda turatyn qyzben otaý qurǵany belgili boldy, - dep habarlaıdy Qamshy.kz Azattyqqa silteme jasap.
Yntymaq aýylynyń ózin «Ǵabıt» dep tanystyrǵan turǵyny «Rýslan - meniń kúıeý balam, qaryndasym Aıaýlym Úmbetqulovamen bes-alty jyl buryn úılengen» dedi.
- Biraq ol bizben birge turmaıdy. Qaryndasym men kúıeý balanyń qaıda turatynyn bilmeımiz. Bizben baılanystary joq. Kúıeý bala Baıqońyrda týǵan. Qazir ekeýiniń bes jastaǵy uldary bar. Kúıeý bala ákesi joq, kóp aǵaıyndy ekenin aıtqan. Basynda qaryndasym «namaz oqıdy» degende jaqsy bala ǵoı dep qýanǵanbyz. Qaryndasyma hıdjapqa uqsas jaýlyq taqqyzdy, - deıdi Ǵabıt.
Onyń aıtýynsha, Rýslan Kúlekbaev pen qaryndasy úılengende eki jaq kelispeı qalyp, keıin qudalar aralaspaı ketken.
- Jigit jaq [ekeýi úılengende] toı jasamady. Ruqsat surap quda túsken de joq. Sondyqtan betimizdi kórmedik dep aralaspaı kettik, - deıdi Ǵabıt.
Ǵabıt kúıeý balasy Rýslandy birneshe jyl buryn bir ret kórgenin, olardyń turatyn jerlerin jıi aýystyratynyn aıtady. Ol Rýslannyń bir ret isti bolǵanyn tanystarynan estigen.
Al Yntymaq aýylynyń ýchaskelik polısıasy Eskendir Bektas Rýslan Kúlekbaevtyń ol aýylda turmaǵanyn aıtady.
- Yntymaqta turady degen soń tekserdik. Onyń aýylda turmaǵany, tek qyz alǵany anyqtaldy. Qyzdyń ata-anasy kúıeý balalaryn tek bir-eki ret kórgenderin, qazir aralaspaıtynyn aıtty. Olar kúıeý balasy men qyzynyń Yntymaqta turǵanyna qarsy bolyp, turǵyzbaǵan, - deıdi polısıa ókili.
Yntymaq aýyly qaraıtyn Boraldaı aýyldyq okrýgy ákimdiginiń salyq qyzmetiniń Janar esimdi mamany Azattyq tilshisine «Rýslan Kúlekbaevty ákimdiktegi qujattardan da, salyq bazasynan da izdep, esh derek tappaǵanyn» habarlady.
Baıqońyr qalasynyń Talǵat esimdi turǵyny kúdikti Rýslan Kúlekbaevty qalada syrttaı bir-eki ret kórgenin aıtady. Ony «tuıyq bala bolatyn» deıdi.
- Baıqońyrda 7-yqshamaýdanda turdy. Qaladaǵy Gagarın atyndaǵy 8-qazaq mektebinde (qazirgi 275-mektep – red.) oqyǵan. Áke-sheshesi ajyrasyp ketken. Sheshesi Baıqońyrda turady. Ekinshi ret sottalyp shyqqan soń Almatyǵa ketti. Baıqońyrǵa anda-sanda kelip turatyn. Mektepte tuıyq, kóp sóılemeıtin bala boldy. Biraq araq iship alsa, tóbeleske kirip ketetin. Túrmege tóbelesip otyryp shyqqan, - dedi Talǵat.
Tilshiler Rýslan Kúlekbaevtyń týystarymen Baıqońyrdaǵy tanystary arqyly sóılespek bolǵan edi, biraq olar qandaı da bir aqparat ıa derek berýden úzildi-kesildi bas tartty.
İshki ister mınıstri Qalmuhanbet Qasymov «Rýslan Kúlekbaev ustalǵanǵa deıin Almatyda «áıel óltirdi» degen kúdikpen izdeýde júrgen» dep habarlady. «Ustalǵan Kúlekbaev túrmede otyrǵan jyldary úshin polıseılerge óshtesken. Solardan kek alý úshin oq atqan» deıdi mınıstr.
Almaty ákimi Baýyrjan Baıbek qazir kúdiktiniń qaladaǵy tergeý ızolátorynda otyrǵanyn aıtty.
Shildeniń 18-i kúni kúdikti Almatydaǵy Abylaı han dańǵyly boıyndaǵy «Qazaqkonsert» ǵımaraty janynda ustalǵan. Qazaqstan prezıdenti Nursultan Nazarbaev ol shabýyldy terakt dep baǵalady.
