Jaqynda «Egemen Qazaqstan» gazetiniń basshylyǵyna Darhan Qydyráli taǵaıyndaldy. Bas gazettiń buǵan deıin de basshysy aýysqanyna kóp bolmaǵan. Saýytbek Abdrahmanovtyń Májilis depýtaty atanýyna baılanysty onyń ornyn buǵan deıin vıse-prezıdent laýazymyn atqaryp kelgen Erkin Qydyr basqan edi.
Baıqaýymsha, keı azamattarǵa «Egemen» basshylyǵyndaǵy aýys-túıis jaqpaǵan sıaqty. Darhan Qydyráliniń taǵaıyndalýyn synap, Erkin Qydyr ekeýiniń arasyna ot salýǵa nıettiler bar.
Alysqa barmaı-aq, arasy alys emes osy eki taǵaıyndaýdy qoǵam qalaı qabyldady? Sony eske alsaq, kóp nársege qanyq bolasyz. S. Abdrahmanovtyń ornyna E. Qydyr myrza taǵaıyndalǵanda resmı málimdemelerden basqa, bul habardy qýana qabyldaǵan jurt kórmedik. Kópshilik, «Egemende» jumys júıesi ózgermeıdi. Eski saryn saqtalady. Gazettiń jańarýyn kútpeı-aq qoıyńyzdar» degendeı pikir bildirip jatty. Al, D. Qydyráli taǵaıyndalǵan sátte súıinshilegen habar jelide jeldeı esti. Erekeńdi tómendetý oıymyz joq, biraq bul – shyndyq. Abaevty synaýshylar abaılamaı E. Qydyr myrzanyń da bedeline nuqsan keltirip otyrǵandaryn bile me eken?
Osy rette jýrnalıs Amangeldi Myrzabektiń eki azamatqa qatysty alyp-qashpa áńgimege qatysty aıtqanyn attap óte almaımyz.
«Egemen Qazaqstan» gazetine jańadan basshy bolyp barǵan Darhan Qydyráli men sol basylymnyń bas redaktory qyzmetin atqaryp otyrǵan Erkin Qydyrdyń arasyna ot tastaǵandaryńdy qoıyńdar, jigitter. Erkin aǵamdy da, Darhan baýyrymdy da qatty syılaımyn. Ekeýi de qazaqtyń myqty azamattary. Qyzmette turǵan ne bar? Mysaly, meniń bilimim men tájirıbem kúni keshe ǵana bastyǵym bolǵan Jasulan Ábdihalyq nemese Berik Ýálıden kem dep kim aıta alady? Biraq soǵan qaramastan Jasulanmen de, Berikpen de jaqsy syılasyp, jumys istedik. Olar qazir basqa qyzmetke aýyssa da sálemimiz de, bir-birimizge degen nıetimiz de, qarym-qatynasymyz da túzý. Adamnyń myqtylyǵy qyzmetimen emes, eline sińirgen eńbegimen ólshense kerek. Eger Darhannyń kim ekenin bilgileriń kelse, onyń Mustafa Shoqaı týraly jazǵan eńbegin oqyńdar. Tym usaqtala bermeńder, jigitter. Qyzmet - qoldyń kiri», - deıdi A. Myrzabek.
Túrki balasynyń rýhanı tutastyǵy, baýyrlas halyqtardyń mádenı murasyn dáripteý, tarıhyn zerdeleý isinde qyrýar jumys atqarǵan D. Qydyráliniń qolynan gazet basqarý kelmeıdi dep kim aıta alady? Memlekettik júıeniń qaı salasy bolsyn jańa mamandarǵa, jańa formatta jumys isteıtin qyzmetkerlerge zárý. D. Qydyráli bas gazet basshylyǵyna kelgeli kóp ýaqyt bolmasa da, azamat iskerligin kórsetip jatyr. Kesheli beri «Egemenge» kúshtep jazǵyzýǵa tosqaýyl qoıylady» degen aqparat taraýda. Sol jazdyrýdy toqtatpasa da, osy kúnge deıin kúshtep jazdyrýdyń bolǵanyn moıyndaý úshin de jańa basshy kerek emes pe?
Aıta berse, áńgime kóp. Sondyqtan Amangeldi myrzanyń sózine toqtaǵan jón sıaqty. El ishi onsyz da alasapyran bolyp jatqanda, elim degen azamattardyń etegine jarmasyp, keri tartpaıyq. Tym usaqtalmaıyq!
Jomart Abdollauly
