Jemqorlyq qylmystar jasady dep aıyptalyp, segiz jylǵa bas bostandyǵynan aırylǵan burynǵy premer-mınıstr Serik Ahmetovtyń qylmystyq isinde sot sheshimimen tárkilenýi tıis múliktiń tizimi bolmaı shyqqan, - dep habarlaıdy Qamshy.kz informburo.kz-ke silteme jasap.
Sottalǵan S. Ahmetovten tárkilenetin eshteńe joq ekeni sot oryndaýshylary sot sheshimin júzege asyrýǵa kiriskende belgili bolǵan.
S. Ahmetovke qatysty sot úkiminde tárkilenýge jatatyn múlik tiziminiń joqtyǵy kezekti sot barysynda anyqtalǵan.
Sot oryndaýshy is júzinde Ahmetovke tıesili delingen «Topar jylyjaılary» JSHS-nan onyń úlesin bólip berýdi surap sotqa ótinish bergen. Sýdıa bolsa úkimniń túsinikiz tustaryn túsindirý týraly qaýly shyǵaryp, seriktestiktiń 95 paıyz úlesi S. Ahmetovke, qalǵany burynǵy dırektory Aleksandr Zabırovqa tıesili ekenin kórsetken.
Alaıda, prokýratýra sot qaýlysyna narazylyq bildirip, kásiporyndy túgeldeı S. Ahmetovke tıesili dep tanýdy talap etken. Osy jerde jylyjaıdyń tárkilenýge jatpaıtyny, tipti, tárkilenetin múlikter engizilgen tizimniń joqtyǵy anyqtalǵan. Bul týraly sotta múddeli tarap «QazAgroQarjy» AQ (jylyjaı atalǵan AQ-da kepilde turǵan – red.) ókili habarlaǵan. Jylyjaı tárkilengen jaǵdaıda «QazAgroQarjy» kepilzattan jáne jylyjaıǵa buryn berilgen qarjynyń qaıtarylý múmkindiginen aıyrylatyn kórinedi.
«Ahmetovke qatysty sot úkiminde tárkileýge jatatyn birqatar múlikter joq. Sonymen qatar, kepilzatty joǵaltqan jaǵdaıda «Topar jylyjaılary» JSHS buryn alynǵan qarjy men jylyjaı quraldarynyń lızıńin qaıtarý múmkindiginen aıyrylatynyn, sonyń saldarynan memleketke «QazAgroQarjy» AQ arqyly kólemdi nuqsan keletinin eskkerýińizdi suraımyn. Óıtkeni, jylyjaı kesheniniń qurylysyna qarajat Ulttyq qordan bólingen», - deıdi «QazAgroQarjy» AQ ókili Janna Taǵanasova.
Sot nátıjesinde sýdıa «QazAgroQarjy» AQ-ǵa jaqtasyp, úkimdi túsindirý týraly qaýlynyń kúshin joıǵan. Sóıtip, sot oryndaýshylarynyń «Topar jylyjaılary» JSHS-daǵy úlesti bólý týraly sotqa ótinishi qanaǵattandyrylmaǵan. Osylaısha, sot oryndaýshylary tárkilemek bolǵan jalǵyz múlikke sot tyıym salyp otyr.
Osy jaǵdaıǵa baılanysty túsinik bergen Qaraǵandy oblystyq sotyndaǵylar isti tergeý kezinde kemshilikterdiń oryn alǵanyn aıtqan.
«Úkimde tárkilenýge jatatyn múlikter tizimi bolmady. Óıtkeni, ol tizim sotqa usynylǵan tergeý materıaldaryna tirkelmegen. Barlyq suraqtar tergeýge qatysty», - depti oblystyq sottyń baspasóz qyzmeti.
Esterińizge salsaq, S. Ahmetov ótken jyly jeltoqsan aıynda sot sheshimimen 10 jylǵa bas bostandyǵynan aıryldy. Bıyl 14 naýryzda apelásıalyq shaǵymdy qaraǵan sýdıa eks-premerdiń jazasyn 8 jylǵa deıin qysqartqan bolatyn. Apelásıalyq sot otyrysy aldynda S. ahmetovtyń týystary men dostary memleketke keltirildi delingen 2 mıllıard 200 mıllıon teńgeni qazynaǵa qaıtarǵan bolatyn. Qazir S. Ahmetov Qaraǵandy oblysy Qarabas eldi mekenindegi túzeý mekemesinde jazasyn óteýde.
S. Ahmetov isi boıynsha barlyǵy 21 adam tergeýge alynyp, aıyp taǵyldy. Eks-premermen birge sottalǵan Qaraǵandy oblysynyń burynǵy ákimi Baýyrjan Ábdishev pen Qaraǵandy qalasynyń burynǵy basshysy Meıram Smaǵulov, Qaraǵandy qalasy Jer qatynastary bóliminiń burynǵy basshysy Ernar Dáribekov merziminen buryn bostandyqqa shyqty.
