Aqtóbelik polıseıler qaladaǵy teraktige qatysy bar úsh kúdiktini qamaýǵa aldy. Olar 5 maýsym kúni Dmıtrıı Tańatarov bastaǵan radıkaldarmen birge DAISH (QR aýmaǵynda qyzmetine zańmen tyıym salynǵan uıym – red.) kósemderiniń biri joldaǵan aýdıoúndeý tyńdaǵan kórinedi, - dep habarlaıdy Qamshy.kz.

Kúdikti úsheý ótken aptada ustalǵanymen, ol týraly aqparat keshe taraǵan. Olar qarý dúkenin tonaý men áskerı bólimge shabýyl jasaýǵa qatyspaǵany aıtylýda. Úsheýi de endi ázirlenip jatqan terakt týraly tıisti organdarǵa habar bermegeni úshin jaýapqa tartylatyn bolady.

Esterińizge salsaq, Aqtóbe qalasynda 5 maýsym kúni bir top radıkal qarý-jaraq dúkenderin tonap, sondaǵy Ulttyq ulannyń áskerı bólimine shabýyl jasaǵan edi. Lańkesterdiń qolynan 7 adam qaza tapty. Arnaıy operasıa kezinde 18 kúdiktiniń kózi joıylǵan bolatyn.

Aqtóbedegi oqıǵany Elbasy N. Nazarbaev salafızm aǵymyna ergen radıkaldardyń jasaǵan terorıstik áreketi dep baǵalady.