Sırıada terrorlyq topqa múshelik etken Marat Ómirzaqovqa qatysty sot úkimi shyqty. Teris aǵymdy ustanǵan Soltústik Qazaqstan oblysynyń turǵyny 7 jylǵa bas bostandyǵynan aıyryldy, - dep habarlaıdy  Qamshy.kz Astana arnasyna silteme jasap.

Petropavl qalalyq soty bergen málimetke sáıkes, Marat Ómirzaqov 2012 jyly Sırıaǵa zańsyz jolmen ótken. Ol úkimetke qarsy terrorlyq aktilerdi uıymdastyrǵan «Al-Mýhadjerın Val-Ansar» atty topqa múshelik etken. Sýdıanyń aıtýynsha, sottalǵan azamat terrorlyq aktilerge tikeleı qatyspasa da, atalǵan uıymnyń shekarasyn kúzetip, barlaý jumysyn júrgizgen. 2015 jyly Túrkıaǵa jasyryn jolmen ótip, osy eldiń mıgrasıalyq zańyn buzǵany úshin quryqtalǵan bolatyn. Keıin 2016 jyldyń 14 qańtarynda Qazaqstanǵa deportasıalandy.

"1969 jylǵy Ómirzaqov Marat Eskendirulyn Qazaqstan Respýblıkasy Qylmystyq kodeksi 233-babynyń 2-bólimi boıynsha kináli dep tabylyp, 7 jylǵa bas bostandyǵynan aıyrylsyn. Sottalǵan azamat jazasyn jalpy tártiptegi kolonıada ótesin. Dáıek zattar retinde qoldanylǵan dıskiler men gazettiń kóshirmeleri qylmystyq istiń ishinde saqtalsyn", - dep oqydy Petropavl qalalyq sotynyń sýdıasy Mıhaıl Gýsev.

Al Ómirzaqovtyń qorǵaýshylary sot úkimimen kelispeıtindikterin aıtady. Advokattyń paıymdaýynsha, sottalǵan azamat Sırıaǵa múldem aıaq baspaǵan. Jaqtaýshy tarap Marat Ómirzaqovqa taǵylǵan kiná negizsiz dep otyr.

-Kýágerler retinde sottalyp ketken kisilerdi alǵan. Basqa dáleldemeleri joq. Odan basqa qylmystyq iste Marat Ómirzaqovtyń qolynda Islam dinin nasıhattaıtyn materıaldar tabyldy delingen. Biraq bul basylymdar zańsyz dep tanylmaǵan. Biz sottyń úkimimen kelispeımiz. Apelásıalyq sotqa aryz jazamyz, - deıdi  Marat Ómirzaqovtyń advokaty Qýandyq Muhamedárov.