Búgin el Almatyda oryn alǵan terakt qurbandaryn aqtyq saparǵa shyǵaryp salyp, aza tutyp jatyr. Halyqtyń tynyshtyǵy úshin kúresken jas-jas jigitter bir-aq sátte lańkestiń qolynan qaza tapty. Bul tek marqumdardyń otbasyna túsken aýyrtpalyq emes, Qazaqstan halqynyń qaıǵysy. Resmı túrde elde qaraly kún jarıalanbaǵanymen, halyqtyń kóbi qaıǵyly kóńil-kúıde. Bolǵan jaıttan áli esin jıa alar emes.
Alaıda, bul qaraly habar, qaıǵyly kóńil-kúı premer-mınıstr Kárim Másimovke onsha áser ete qoımaǵan sekildi. Almatyǵa baryp, qaraly otbasyǵa kóńil aıtýdyń ornyna Kárim Qajymqanuly serilik qurǵan jigittik shaǵyn eske alyp, shalqyp otyr. Úkimet basshysy óziniń Instagram-paraqshasyna jastyq shaǵynda túsken beınejazbany júktep, kópshilikpen bólisti. Árıne, premerdiń ishine kirip-shyqqan joqpyz, qaıǵyrsa qaıǵyryp-aq júrgen shyǵar. Biraq, dál búgin, ıaǵnı janaza shyǵyp jatqan kezde kóńil kótermeı-aq qoısa bolatyn edi ǵoı?!
Muny aýyldaǵy "Sársenbaı", álde "Beısenbaılar" jasap jatsa úndemes edik. Tipti, bilmes te edik. Al, bútin bir memlekettiń úkimetin basqaryp otyrǵan tulǵanyń osynaý áreketi kóńilge túrli oı salyp otyr.
Másimovke renishin, áleýmettik jelilerde jetkizip jatqandar az emes. Solardyń biri tanymal jýrnalıs - Dına Elgezek.
«Búgin qazaq úshin qaraly kún... Qapyda qaza tapqan úsh arysyn el aqtyq saparǵa shyǵaryp saldy... Al, Premer~mınıstr Kárim Másimov bolsa búgin serilik qurǵan jigittik bal shaǵyn eske alyp shalqyp otyr... Sonaý stýdenttik kezeńnen saqtalyp qalǵan beınejazbany kóppen bólisip, kóńil birledi... Qoldan saıasatker jasaýdyń kúlmınasıalyq sáti osy shyǵar... Budan ary ketse, ne bolaryn boljaý qıyn... Iá, Molyqbaıdyń urpaǵy ekeni ras bolsa, ótkenge emirenip emes, úsh bozdaqty shyǵaryp salǵan azaly toptyń ortasynda kúńirenip turar edi-aý...», - deıdi ol.
Esterińizge salaıyq, Almatydaǵy lańkestik oqıǵa 18 shilde kúni tańerteń oryn alǵan bolatyn. Sýyq qarýlanǵan er azamat qaladaǵy polısıa bólimsheleriniń birine kelip, birneshe qyzmetkeri atyp salǵan. Lańkes munymen toqtamaı, kóshedegi beıbit turǵyndarǵa oq jaýdyrypty. Saldarynan 4 polıseı men 2 qarapaıy azamat kóz jumdy. Búgin Almaty men Jambyl oblystarynda olardy jerleý rásimderi ótti.
