Shymkentte «Garant» degen uıaly telefondar men kompúterdiń qosalqy bólshekterin satatyn úlken saýda ortalyǵy bar. Ózi týra qalanyń qaq ortasynda, adamdardyń eń kóp júretin jerinde ornalasqan. Sol dúkenniń aldy «saqaldylarǵa» tola. Bári de b/ý «sotka» satýmen nemese olardy jóndeýmen aınalysady.
Alǵashqyda «bulardy eshkim jumysqa almaǵandyqtan saýdamen aınalysady ǵoı» dep mán bermeıtinbiz. Óıtkeni, «saqaldylardyń» kóbi JOO-ny sońyna deıin oqymaıdy, dıplom alǵandarynyń kóbi bazar men meshitterdiń mańyn jaǵalaýdan ary asa almaıtyny belgili. Keıin baıqasaq, tek Shymkentte emes, Qazaqstannyń barlyq qalalarynda da b/ý «sotka» satýmen «saqaldylar» aınalysady eken. Almatyda, Astanada, Aqtóbede, Jezqazǵanda kórgenimiz osy.
Nege bulaı dep bas qatyryp júrsek, jaýabyn quqyq qorǵaýshylardyń ózderi biletin sekildi. Belgili jýrnalıs Arman Sqabylulynyń aıtýynsha, bul saýaldyń jaýabyn oǵan zeınettegi polıseılerdiń biri aıtyp bergen eken.
«Nege olar negizinen osy kásipke úıir?» Bul saýaldy ishki ister organdarynda uzaq jyldar istegen tanysyma qoıdym. Aty - jónin belgili sebepterge baılanysty ataı almaımyn.
- Bizge uıaly telefondaryn urlatqan, joǵaltqandar jıi aryz jazady, - deıdi ol, - jeke kody arqyly kóbine taýyp berip jatamyz. Birde sondaı bir telefondy taptyq. Bir jas bala ol «sotkany» «Kók bazardan» satyp alǵan eken. Satqan «saqaldy» . Úıge kelip shuqylap kórse uıaly telefonnyń ishinde arnaıy faılǵa jınaqtalǵan túrli ýaǵyzdar bar bolyp shyqqan. «Saqaldylardyń» bul saýdaǵa qyzyǵýynyń bir sebebi osy. Baıqamaǵansyp eski telefonǵa ýaǵyz toly faıldy qaldyra salady. "Sotkanyń» jańa ıesi faıldy ashsa boldy. Ári qaraı sananyń ýaǵyzǵa ýlanýy bastalady... Al, «saqaldynyń» bul qylmysyn moınyna qoıý tipti qıyn. Óıtkeni ol da bul telefondy bireýden satyp aldy ǵoı.
...Tanysymnyń bul áńgimesine tıisti organdar nazar aýdarady dep oılaımyn. Menińshe bul «saqaldy» men «sotkaǵa» baılanysty qupıanyń bir ǵana mysaly. Bulardy basqa da máseleler baılanystyrýy ábden múmkin», - deıdi jýrnalıs óziniń Facebook paraqshasynda.
Jýrnalıs Baýyrjan Karıpov te «sotka» satatyn saqaldylardy teksergen jón degen pikirde. Óıtkeni, shuqyp-shuqyp telefondy iske qosqan adam ózge de nárseni iske qospaıtynyna kim kepil deıdi ol.
Munyń bárin nege aıtyp otyrmyz? Keshe Almatyda polısıa bólimine shabýyl jasap, 5 adamdy atyp óltirgen kúdiktiniń salafılermen tyǵyz baılanysta bolǵanyn QR UQK tóraǵasy V.Jumaqanov aıtty. Terakt jasady dep qamaýǵa alynǵan Rýslan Kúlikbaev buryn uıaly telefon satýmen de aınalysqan eken. Demek, muny dabyl qońyraýy dep túsingen durys shyǵar. Aýrýyn jasyrǵan óledi deıdi atam qazaq. Endi quqyq qorǵaýshylar problemany qazirden sheshýi tıis. Áıtpese, jar astyndaǵy jaý jaǵadan aldy.
