Maýsymnyń 5-i Qazaqstandy dúrliktirgen Aqtóbedegi qarý-jaraq dúkenderi men áskerı bólimge shabýyldan bas tartqan úsh adam keshe «qylmys týraly habarlamady» degen aıyppen eki aıǵa qamaldy. Azattyq tilshisi tergelip jatqandardyń biri Rýstam Gasaev jaıly zerttep kórdi, - de p habarlaıdy Qamshy.kz.
Shildeniń 20-sy kúni Aqtóbe oblystyq sotynyń baspasóz qyzmeti maýsymnyń 5-si kúni 26 adam jasaǵan qarýly shabýylǵa qatysty taǵy úsh kúdiktiniń eki aıǵa qamalǵanyn habarlady.
Sot sanksıasymen tergeý ızolátoryna qamalǵan úsh azamat- Rýstam Gasaev, Ákimjan Kýsımov pen Qojamurat Saǵyntaev. Úsheýiniń jastary da shamalas - qyryqtyń ústinde.
Azattyq Aqtóbedegi shabýylǵa qatysty maqalalar tizbegin jalǵastyra bermek. Osy joly Azattyq tilshisi Rýstam Gasaev jaıly zerttep kórdi. Týystary onyń maýsymnyń 5-si kúni «shabýyl jasaýǵa dastarqan basynda qarsy shyqqanyn» aıtady.
Aqtóbe oblystyq soty taratqan málimetke qaraǵanda, Aqtóbe qalasynyń turǵyny Rýstam Gasaevqa Qazaqstan qylmystyq kodeksiniń 434-baby boıynsha aıyp taǵylǵan. Iaǵnı, 42 jastaǵy Rýstam Gasaev «Qylmys týraly habarlamady» dep aıyptalyp otyr.
Qylmystyq kodekstiń 434-babynda «daıyndalyp jatqany nemese jasalǵany anyq belgili asa aýyr qylmys ne daıyndalyp jatqany anyq belgili terorızm aktisi týraly habarlamaý» qarastyrylǵan. «Alty myń aılyq eseptik kórsetkishke deıingi mólsherde aıyppul salýǵa ne sol mólsherde túzeý jumystaryna ne alty jylǵa deıingi merzimge bas bostandyǵyn shekteýge ne sol merzimge bas bostandyǵynan aıyrýǵa jazalanady».
Rýstam Gasaevtyń 80 jastaǵy qart anasy Gúlara Jeksenqyzy, ápkesi Márıam jáne inisi Iskander Aqtóbeden 25 shaqyrymdaı jerdegi Marjanbulaq aýylynda turady.
Aty-jónin ataǵysy kelmegen aýyldastary Gasaevtardy «din jolyn ustanatyn, eshkimge zıany joq jigitter» dep sıpattady. Olardyń sózderine qaraǵanda, Gasaevtyń anasy Gúlara Jeksenqyzy – aýyl belsendisiniń biri. Turǵyndar «kóshelerge sý men jaryq sol kisiniń belsendiligi arqasynda tartylǵan» deıdi.
Aqtóbedegi shabýyl týraly sýyq habardy estigen kúni esinen tanyp qalǵan qart ana Azattyq tilshisi barǵanda áli syrqattanyp jatyr eken.
- Kúıeýimniń ulty sheshen bolatyn. Uzaq jyl Sheshenstan astanasy Groznyıda turdyq. Soǵys bastalǵanda (1991 jyly) Qobdadaǵy tórkinderimdi saǵalap, Qazaqstanǵa kóshtik. Kúıeýim Sheshenstanda bomba jarylǵanda jaralanyp, sodan ońalmady - deıdi aýyldastary «Klara apa» atap ketken Gúlara Jeksenqyzy.
Zeınetker máseleniń mán-jaıy Qazaqstan prezıdenti Nursultan Nazarbaevtyń qulaǵyna jetse, ulynyń jazasy jeńildeıtinine senetinin aıtyp, Azattyq tilshisinen analyq tilegin jetkizýdi ótindi.
Al ápkesi Márıam Gasaevanyń sózine qaraǵanda, eki balanyń ákesi (uly – 13, qyzy 6 jasta) Rýstam otbasymen birge Aqtóbede turady. Qarýly shabýyl bolatyn kúni ol úıinen «qonaqqa baramyn» dep shyǵyp ketken.
- Dastarqan basynda qarýly shabýyl týraly áńgime qozǵalǵanda Rýstam men ózge de eresekteý jigitter birden qarsylyq bildirgen. Jastarǵa basý aıtqan. Soǵan ashýlanǵan jastar jaǵy dastarqan basynan turyp ketedi. Al bular bolsa, alańsyz qala bergen, - deıdi ol.
Ol inisin Aqtóbedegi páterinen polısıa «maýsymnyń 6-sy, tańǵy saǵat 8-der shamasynda alyp ketkenin» aıtty. Sodan beri týystary onymen bir-aq ret kezdesken. Márıamnyń aıtýynsha, alǵashynda «máseleniń mán-jaıy anyqtalǵansha ustaımyz» degen UQK departamenti ókilderi kezdesýge ruqsat bermegen.
Ol inisiniń «5-razrádty (joǵary bilikti) kondıter ekenin, sońǵy jyldary kásibi boıynsha jumys tappaı, bazarda qalta telefonyn satqanyn» aıtty. Rýstam Gasaev jubaıymen birge Aqtóbede páter jaldap turǵan. İnileri sekildi din jolyn ustanatyn Márıam Gasaeva Rýstamnyń aqtalyp shyǵatynyna asa senińkiremeıdi.
- Tergeýshiniń sózinen uqqanym - advokat jaldaýdyń paıdasy bolmaıtyn sıaqty. Ári oǵan aqshamyz da joq. Memleket esebinen tegin advokat berildi. Qaıdam... Olar prosesti bastap jiberdi. Endi kinálilerdi jazalaý ǵana qalǵan sıaqty, - deıdi Márıam.
2016 jyly maýsymnyń 5-i kúni Aqtóbede 26 adam eki qarý-jaraq dúkenine shabýyldap, ulttyq gvardıanyń áskerı bólimin basyp alýǵa tyrysqan. Shabýyl men atystan resmı málimet boıynsha 7 adam qaza taýyp, 40 shaqty adam jaralanǵan. Alty kúnge sozylǵan arnaıy operasıada shabýylǵa kúdikti delingen 18 adamnyń kózi joıylyp, birneshe adam ustalǵan edi.
