Terrorıster túrmede jatyp-aq qataryn kóbeıtýde. Óıtkeni, qazir ekstremızm úshin isti bolǵandardar ózge qylmyskerlermen bir kamerada jazasyn ótep jatyr. Jat aǵymnyń jeteginde ketkender abaqtyda da tynysh jatpaı, jasyryn úgit-nasıhat júrgizip, janyndaǵylaryn dininen adastyrady eken. Arbaýǵa kóbine jastar men psıhologıalyq turǵydan álsiz adamdar túsip qalady. Sondaılardyń biri - Almatyda atys jasaǵan Rýslan Kúlikbaev. Abaqtyda salafıttermen baılanysqan ol bostandyqqa shyqqan soń terakt jasaǵan, - dep habarlaıdy Qamshy.kz KTK arnasyna silteme jasap.
Qazir elimizdegi túrmelerde 500-ge jýyq terrorıst jazasyn ótep jatyr. Olardyń ár jyly bolǵan teraktilerge qatysy bar. Bas prokýratýranyń málimetinshe, tek bıyl 40-qa jýyq adam terorızm baby boıynsha sottalypty. Kóbi Sırıa men Ýkraınadaǵy soǵysqa qatysqan. Dininen adasqandar abaqtyda da tynysh jatqan joq. Jan-jaǵyndaǵylarǵa jasyryn úgit-nasıhat júrgizip, ózgelerdiń de sanasyn ýlaýda. Máselen, eki ret sottalyp, jazasyn ótep shyqqan Rýslan Kúlikbaev ta túrmede salafıttermen tyǵyz qarym-qatynasta bolǵan eken.
-Kúlikbaev Rýslan Alpysbaıuly 11 maýsym 1990 jyly týǵan. Qyzylorda oblysynyń týmasy. Túrmede salafıttermen baılanysqan. Qazir tekserip jatyrmyz, - deıdi QR UQK tóraǵasy Vladımır Jumaqanov.
Degenmen, İshki ister mınıstrligi ózderine shań jýytqysy joq. Túrmedegi ózge qylmyskerlermen birge jazasyn ótep jatqan terrorısterdi jiti baqylaýda ustap otyrmyz deıdi olar.
-Ulttyq qaýipsizdik komıtetimen birlesip keshendi jumystar júrgizemiz. Terorızm men ekstremızm úshin sottalǵandarmen jeke-jeke sóılesemiz. Túrmege teologtar da keledi. Sondyqtan adam túrmeden sektant bolyp shyqty degenge senbeımin, - deıdi QR İİM Qylmystyq atqarý júıesi komıteti tóraǵasynyń orynbasary Meıram Aıýbaev.
Alaıda, budan esh nátıje joq. Ásire dinshilder kózge túspeýge tyrysady, asqanada, kórshisimen jalǵyz qalǵanda, túnde nasıhat júrgizedi eken. Keıin qashyp shyǵýdyń josparyn qurady. Osydan alty jyl buryn Aqtaýdaǵy túrmeden adam óltirgeni úshin sottalǵan 20 sottalýshy qashyp, 7-ýi sol jerde kúzetshilerdiń qolynan qaza tapqan edi. Qalǵany Qyzylsaı shatqalynan tabyldy. Taǵy bir toby óz-ózderin órtep jibergen bolatyn. Arada jyl ótken soń Balqashtaǵy túrmeden de muzdaı qarýlanyp qashpaq bolǵan 16 adamnyń kózi joıyldy. Atys kezinde túrmeniń bir qyzmetkeri oqqa ushty. Qylmyskerlerdiń keıin túrmede din jolynda júrgeni anyqtalǵan bolatyn.
Elimizde byltyr 16 myń adam jazasyn ótep, bostandyqqa shyǵypty. Onyń 700-i terorızm baby boıynsha sottalǵandar. İshki ister mınıstrligi jazasyn óteýshiler ekinshi ret qylmys jasamaý úshin probasıa ıaǵnı abaqtydan keıin ómirge beıimdeý týraly arnaıy zań jobasyn jazyp shyǵypty. Ony kúzde parlamentke tanystyrmaq. Jańa qujat qabyldansa, qylmyskerlerge bostandyqqa shyqqanda áleýmettik jaǵdaı jasalady, tipti jumys ta taýyp bermek.
