Memleket basshysy Nursultan Nazarbaev «Azıa Avto» kásipornynda bolyp, «Lada» jelisiniń jańa modelderimen tanysty, Sogra kentindegi tolyq sıkldi avtomobıl zaýytynyń qurylysyn aralady, - dep habarlaıdy Qamshy.kz Altaynews.kz  -ke silteme jasap.

Bir apta buryn ǵana tusaýy kesilgen jańa óndiristik jelini Elbasyǵa kásiporynnyń dırektorlar keńesiniń tóraǵasy Anatolıı Balýshkın tanystyrdy. «Bıpek Avto-Azıa Avto» kompanıalar toby búginde General Motors, SkodaAuto, Volkswagen, KIA Motors, Renault-Nissan AVTOVAZ sıaqty álemdik konserndermen tehnologıalyq áriptestik ornatyp, eldegi avtomobıl óndirisin alǵa súırep keledi. Kásiporynnyń «Lada» markaly ónimderine qazaqstandyqtar tarapynan suranys mol. Buǵan deıin «Azıa Avto» atalmysh jeliniń tek Lada 4h4 jáne Urban modelderin ǵana shyǵaryp kelgen. Jol talǵamaıtyn bul «Nıvalardyń» biri aýyldy aımaqqa arnalsa, biri qalaly jerlerge laıyqtalǵan bolatyn. Endi olarǵa Lada Granta, Lada Kalina jáne Lada 4x4 5d modelderi qosylyp otyr. Aldaǵy tamyz aıynda olardyń qataryn Priora tolyqtyrady. Al qyrkúıekke qaraı Vesta jáne XRAY krosoverin, ámbebap Largus kóligin óndirý jolǵa qoıylady. Zaýyttyń aǵa sheberi Dáýren Balǵabaev – «Bolashaq» baǵdarlamasynyń túlegi. Buǵan deıin álemge áıgili jeti mashınasaýshy kompanıanyń tájirıbesimen tanysyp, Volkswagen kompanıasynda jumys istegen maman mundaǵy ónim sapasy almanıalyq kólikterden eshbir kem túspeıtinin atady. 

Kásiporyn basshylyǵy Prezıdentke Lada Largus kóligin «ortalyqtandyrylǵan qalalyq taksı» jobasyna usyndy. Ult Kóshbasshysy bolashaqta elimizdiń qalalarynda birizdendirilgen qalalyq taksı qyzmetin jolǵa qoıý qajettigin qadap aıtqany belgili. A.Balýshkınniń aıtýynsha sol oıdyń údesinen shyǵý jolynda Lada Largus modeli taptyrmas nusqa bolmaq.

-Bul kóliktiń shanaǵy ózge jeńil avtomobılderge qaraǵanda áldeqaıda bıik. Mundaı bıiktik klıenttiń emin-erkin otyrýyna óte qolaıly. Al kóliktiń artqy bóligindegi júksalǵyshy meılinshe keń. Qosalqy bólshekteri men qyzmet kórsetý quny ózge modelderge qaraǵanda arzan. Sondyqtan ony qalalyq taksı kóligi retinde paıdalanýǵa ábden bolady, - dedi Anatolıı Balýshkın. Óz kezeginde memleket basshysy kompanıanyń tabys aıasyn keńeıtý baǵytyndaǵy izdenisin quptaıtynyn jetkizdi.

Esimjan Naqtybaıuly