Elbasy Nursultan Nazarbaev Shyǵys Qazaqstan oblysyna jumys saparynyń qorytyndysy boıynsha BAQ ókilderine arnalǵan brıfıń ótkizdi, dep habarlady Aqordanyń baspasóz qyzmeti.

Qazaqstan Prezıdenti Shyǵys Qazaqstan oblysy elimizdiń iri ónerkásiptik óńiriniń biri ekenin jáne qazirgideı kúrdeli jaǵdaıda jaqsy ósim qarqynyn kórsetip otyrǵanyn atap ótti.

- Men oblysqa el Táýelsizdiginiń 25 jyldyǵynda kelip otyrmyn. Ónerkásiptik óndiris ósimi bıylǵy 5 aıda 39% bolǵany, aýyl sharýashylyǵy 13%-ǵa óskeni, al eńbekaqy 11%-ǵa ulǵaıǵany qýantady, - dedi Memleket basshysy.

Nursultan Nazarbaev óńirde ındýstrıalyq baǵdarlamanyń, sondaı-aq «Nurly jol» baǵdarlamasy aıasynda avtomobıl joldary qurylysynyń tıimdi júzege asyrylyp jatqanyn aıtyp, oblystyń ónerkásiptik áleýetine toqtaldy. 

- Munda «Qazmyrysh», «Qazaqmys», Óskemen tıtan-magnıı kombınaty, Úlbi metalýrgıa kombınaty, eń iri sý elektr stansasy sıaqty elimizdiń jetekshi kásiporyndary ornalasqany málim, - dedi Qazaqstan Prezıdenti.

Memleket basshysy jumys saparynyń birqatar negizgi tustaryna toqtalyp ótti.

- Men bizdiń mashına jasaý ındýstrıamyzdyń alǵashqy qarlyǵashy -  «Azıa AVTO» kásipornyna bardym. Qazaqstan eshqashan avtomobıl shyǵarmaǵan edi, al qazir bizde qurastyrý óndirisi jolǵa qoıyldy. Damyǵan avtomobıl ındýstrıasy bar kóptegen el naq osy qurastyrýdan bastaǵan. Sosyn mamandar daıarlap, jergilikti qyzmetkerler úlesin ulǵaıtyp, birtindep tól óndirisin iske qosty, - dedi Nursultan Nazarbaev.

Memleket basshysy shetelde oqyp kelip, búginde otandyq kásiporyndarda jumys istep jatqan jas mamandardyń úlesin atap ótti.

Qazaqstan Prezıdenti «100 mektep, 100 aýrýhana» memlekettik baǵdarlamasy aıasynda iske qosylǵan oblystyq Qan ortalyǵy sıaqty áleýmettik mekemeler qyzmetiniń mańyzdylyǵyn aıtty.

- Bul nysan densaýlyq saqtaý salasy úshin óte mańyzdy, halyq ta muny túsinip, qan ótkizý úshin top-top bolyp kelip jatyr, - dedi Nursultan Nazarbaev.

Sońynda Memleket basshysy oblystyń jalpy qalypty damyp kele jatqanyn, al túıtkildi máseleler júıeli sheshimin tabatynyn aıtty.