Shyǵys Qazaqstan oblysy Gerasımov aýylynda ımam Ravshan Zýlfıev qonjyq asyrap otyr. Týǵanyna birneshe aı bolǵandyqtan bul janýardan tónetin qaýip joq eken. Ol tek júgirip, shapqylap, oınap qojaıynynyń nazaryn kútedi, dep jazady muslim.kz.

Ravshan Zýlfıevtiń úıi sońǵy eki aptada turǵyndar arasynda erekshe tanymaldylyqqa ıe boldy. Bul, árıne, úıde qonjyqtyń asyr salyp júrgenine baılanysty. Muny kórýge tipti Óskemenniń ózinen at arytyp kelýshiler kóbeıgen.

"Birneshe apta buryn biz bul qonjyqty taýyp aldyq. Onyń anasyna ne bolǵany belgisiz. Biz qonjyqty qutqaryp, úıge alyp keldik. Áıelim qarsy bolǵan joq, al segiz jastaǵy ulym tipti qýanyp ketti. Internetten bul janýardyń qalaı tamaqtanatynyn qarap, jaǵdaıyn jasaýǵa kirisip kettik", - deıdi ımam.

Onyń aıtýynsha atyn qoıýǵa kóp oılanyp jatpaı, Mıshka dep ataı salypty. Arpa, qaraqumyq, balyq, sútpen tamaqtanady. Al onyń súıikti asy, árıne - bal.

"Basynda ol biraz qoryqqan, qazir úırenisip, oınap ketti. Keıde tipti erkelep ketedi. Uıyqtaıtyn oryn retinde baqshalyqtan kishkentaı úıshik jasap berdik. Keshkisin jaqsylap tamaqtanyp alǵan soń tańǵa deıin typ-tynysh uıyqtaıdy", - deıdi Ravshan Zýlfıev.

Iesiniń aıtýynsha, "kerek emes", "tıispe" degen jáne basqa da turmystyq sózderdi túsinedi eken. Eki kún saıyn ózen jaǵasyna baryp serýendep qaıtady.

Imamnyń sózinshe, Mıshka eki aptada 5 keli salmaq qosyp, jyldam ósip kele jatyr deıdi.

"Biz onyń ósip, úlkeıgen soń erke qonjyqtan jyrtqysh aıýǵa aınalatynyn bilemiz. Sol sebepti men qalalyq zoobaqpen kelisip, ol óskende torǵa salynyp, sonda ketetin boldy. Árıne, onymen qoshtasqymyz kelmeıdi, biraq amal ne. Únemi baryp turamyz", - deıdi qojaıyn.