SHQO ákimi Danıal Ahmetov óńirdiń ishki ister departamentinde boldy, onda jeke qurammen kezdesip, ishki ister organdarynyń qaza tapqan qyzmetkerlerine ornatylǵan eskertkishke gúl shoqtaryn qoıdy, dep habarlady ákimniń baspasóz qyzmetinen.

Óńir basshysy SHQO İİD qyzmetkerlerine tıimdi jumysy, qala kóshelerindegi tártip, qyzmettik mindetterin oryndaý kezindegi kásibıligi men erligi úshin alǵys bildirdi.

 «Otanymyzǵa adal qyzmet etkenderiń úshin shyn júrekten alǵys bildiremin. Eldiń  tynyshtyǵyn qorǵap júrsińder. Elge tártip, tynyshtyq, qaýipsizdik kerek. Senderdi elge degen adaldyqtaryń, Prezıdent tapsyrmalaryn múltiksiz oryndaǵandaryń úshin qurmet tutamyz.  Ardagerlerge jas urpaqqa úlgi bola bilgeni úshin alǵysymyz sheksiz , Qazaqstandyq polısıa kúni qutty bolsyn!, - degen tilegin bildirdi D. Ahmetov. - Bizde urpaq sabaqtastyǵy bar. Ótkende Aqtóbedegi oqıǵada İİD qyzmetkerleri aldyńǵy ustanymda kele jatqanyn, Otan aldyndaǵy boryshyn abyroımen, adal oryndaıtynyn kórsetti».

Respýblıka táýelsizdiginiń 25 jylynda SHQO İİO 41 qyzmetkeri qyzmettik mindetin oryndaý barysynda qaza tapty. Olardyń 11-i batyrlyqpen kóz jumdy. Kópshiligi qaıtys bolǵannan keıingi memlekettik jáne vedimistik nagradalarmen marapattaldy. Qaza tapqan qyzmetkerler otbasyna İİD tarapynan materıaldyq jáne basqa da kómekter kórsetiledi.

İshki ister organynyń qaza tapqan qyzmetkerleriniń jesirlerine sóz arnaǵan D. Ahmetov: «Otanyna qyzmet etip júrip, janyn qıǵandardyń erligin máńgi umytpaımyz», - dedi.