Búgingi kúnge deıin elimizdegi jer reformasyn túsindirý úshin qurylǵan Jerturaly.kz saıtyna qazaqstandyqtardan 947 suraq kelip túsip, sonyń ishinde 756-syna jaýaptary daıyndalyp, saıtqa ornalastyrylǵan. Qalǵan 191 adamnyń suraǵyna jaýaptar daıyndalýda. Bul týraly búgin Atyraýda ótip jatqan Jer reformasy boıynsha respýblıkalyq komısıanyń otyrysynda Aýyl sharýashylyǵy mınıstriniń orynbasary E. Nysanbaev málimdedi, - dep habarlaıdy Qamshy.kz.
Onyń aıtýynsha, halyqtan jınalǵan suraqtardy taldasaq, jeke turǵyn úı qurylysyna jer bólýge baılanysty – 114, aýyl sharýashylyǵyna - 357, sheteldikterge aýyl sharýashylyǵy jerlerin jalǵa berý máselesi boıynsha – 176 jáne basqa da saýaldarmen 300 hat kelip túsken.
Mınıstrdiń orynbasary atalǵan saıtpen qatar halyqtyń usynystary men pikirlerin jınap, komısıaǵa jetkizý maqsatynda Call-ortalyq qurylǵanyn atap aıtty. Osy ortalyqqa 2016 jyldyń 14 mamyrynan bastap 23 shildege deıin 12 458 qońyraý shalynǵan. Aımaqtyq call-ortalyqtardyń arasynda eń kóp qońyraý soǵylǵandary: Almaty qalasy (1049), Aqtóbe (842), Almaty oblysy (608) jáne Batys Qazaqstan oblysy (580). Eń azdary – Soltústik Qazaqstan (28), Qostanaı (103) jáne Qaraǵandy (114) oblystary. Atap aıtarlyǵy, osy ortalyqqa kelip túsken saýaldardyń basym kópshiligi – (9583-i, 77 paıyzy) jeke turǵyn qurylysyna qatysty bolǵan.
E. Nysanbaev Jer reformasy boıynsha respýblıkalyq komısıanyń búginge deıin 8 otyrysy ótkenin, sonyń ishinde 4-ýi – Astanada, qalǵandary – Aqmola, Almaty, Qyzylorda oblystarynda jáne Atyraýda ótip jatqanyn jurtshylyqtyń esine saldy. Onyń aıtýynsha, respýblıkalyq komısıanyń fılıaly retinde oblystyq ákimdikter janynan qurylǵan qoǵamdyq keńester halyqpen aýdandyq jáne oblystyq deńgeıde 1,2 myńnan astam kezdesýler ótkizgen. Osy kezdesýlerge 70 myńnan astam adam qatysypty. Bul kórsetkishtiń ózi atalǵan komısıanyń halyqpen tyǵyz qarym-qatynas jasap, tıimdi jumys istegenin bildiredi. Jalpy alǵanda, elimizdiń ár aımaǵynyń turǵyndarynyń komısıa jumysyna belsene aralasýy, óz oı-pikirlerin ashyq, erkin jetkizýi el aýmaǵynda áleýmettik jáne qoǵamdyq mańyzy zor máseleni keńinen talqylaýǵa múmkindik berdi. Buǵan quzyretti komısıa músheleriniń belsendiligi, kásibıligi, memleketshildigi óz septigin tıgizdi.
Ámirlan Álimjan
