Búgingi kúnge deıin atyraýlyqtardan jer reformasyna qatysty 27 usynys-pikirler kelip tústi. Bul týraly búgin Atyraýda ótip jatqan Jer reformasy boıynsha respýblıkalyq komısıanyń kezekti otyrysynda málim boldy, - dep habarlaıdy Qamshy.kz.
Atyraý oblystyq qoǵamdyq keńesiniń tóraǵasy M. Óteshevtiń aıtýynsha, jergilikti halyq jeke turǵyn úı qurylysyna jer bólý, sheteldikterge aýyl sharýashylyǵy maqsatyndaǵy jer ýchaskelerin satýǵa jáne jalǵa berýge tyıym salý, jerdi jalǵa berýdiń burynǵy 10 jyldyq normasyn qaldyrý, jer ýchaskelerin tıimdi paıdalanǵandarǵa óz jerlerin jekemenshikke satyp alý múmkindikterin qarastyrý, jerge baqylaýdy kúsheıtý sıaqty máseleler tóńireginde óz usynys-pikirlerin bildirgen.
«Búginge deıin qoǵamdyq keńeske turǵyndardan 27 usynys-pikirler kelip tústi. Qoǵamdyq keńes músheleri jer reformasy máselelerin aqparattyq-túsindirý jumystary boıynsha qurylǵan 29 toptyń quramyna engizildi (oblystyq – 4, qalalyq – 4, aýdandar - 21). Top músheleri mekemeler men uıymdarda 131 kezdesý ótkizip, sonyń barysynda 171 másele talqylandy. Eń bastysy, qazirgi kezde qoǵamdyq keńester Jer reformasy boıynsha respýblıkalyq komısıamen ózara tıimdi is-áreketterdi júzege asyrýda. Mysaly, oblystyq deńgeıdegi kezdesýde keńeske qatysýshylar qoǵamdyq keńes hatshylyǵyn halyqtyń usynystaryn jınaqtap, respýblıkalyq komııssıa qaraýyna joldaıtyn ortaq organ retinde bekitti»,- dedi M. Óteshev komısıa otyrysynda. Ol sondaı-aq oblys ákimdigi janynan qurylǵan «Jer reformasy máseleleri boıynsha call-ortalyqqa (27-01-11)» qońyraý shalǵan atyraýlyqtar jer reformasyna qatysty alýan túrli saýaldaryna jaýap alyp jatqanyn da jetkizdi.
Máselen, búginge deıin call-ortalyqqa 70 adamnan qońyraý túsipti. Sonyń ishinde 55-i – jeke turǵyn úı qurylysy máselesin, 12-si – jeke máselesin, 3-ýi – jer reformasy boıynsha suraǵan. Qońyraýlardan baıqalǵanyndaı, turǵyndardyń basym kópshiligin (78 paıyzy) jeke turǵyn úı qurylysyna jer ýchaskelerin alý máselesi qyzyqtyrady. Óteshevtiń aqparaty boıynsha, 2016 jyldyń 1 maýsymyna deıin jeke turǵyn qurylysyna jer telimin alý týraly ótinish bergenderdiń sany 81 551-di quraǵan. Sonyń ishinde, tek Atyraý qalasy boıynsha 73 myńǵa jýyq (89 paıyzy) aryz tirkelgen. - Alaıda ınfraqurylym tartylǵan daıyn alańdardyń bolmaýy saldarynan mundaı ótinishter baıaý qanaǵattandyrylýda,- dep atap ótti M. Óteshev.
Ámirlan Álimjan
