Rıo Olımpıadasyna sanaýly kúnde qaldy. Osy oraıda Qazaqstannyń boksshylaryna 4 jylda bir keletin aıtýly dodaǵa Kolýmbıa, Domınıkan, Meksıka elderinen kelgen kásipqoı boksshylar kómektesip jatyr. Olardyń arasynda otandasymyz kásipqoı bokstyń sheberi Qanat Islam da bar. Qanat Olımpıada oıyndaryndaǵy basty úmitimiz Danıar Eleýsinovke sparrıng qarsylas retinde kómektesetin bolady, - dep habarlaıdy Qamshy.kz BNews.kz-ke silteme jasap.

«Barlyq boksshymyz hám rýhanı, hám fızıkalyq turǵydan daıyn. Osy qarqyndarynan jańylmasa, Olımpıada shyńyn baǵyndyrady dep oılaımyn. Endigi jerde biz bir jaǵadan bas, bir jeńnen qol shyǵaryp, Rıoǵa attanatyn 10 boksshymyzǵa qoldan kelgeninshe bir kisideı qoldaý kórsetýimiz kerek. Bárimizdiń de asqaq armanymyz – ánuranymyzdyń Olımpıada kóginde shyrqalýy», - deıdi Qanat Islam.

Aıta keteıik, bul – olımpıada aldyndaǵy boksshylarymyzdyń sońǵy jattyǵý jumystary. Sońǵy sparrıngter 25 jáne 27 shilde kúnderi ótedi. Al 28 shildede sańlaqtarymyz Rıoǵa jol júredi.