Jambyl oblysynda Kongo-Qyrym qandy bezgegin juqtyrdy degen kúdikpen Sarysý aýdanynyń eki adamy aýrýhanaǵa jatqyzyldy, dep habarlaıdy Qamshy.kz QazAqparatqa silteme jasap.
«19 jáne 20 shilde kúnderi Sarysý aýdanynyń Saýdakent aýyldyq aýrýhanasyna Kongo-Qyrym qandy bezgegin juqtyrdy degen kúdikpen eki adam - 40 jastaǵy er adam men 65 jastaǵy áıel adam jatqyzyldy. Ekeýiniń de jaǵdaıy turaqty. Epıdemıaǵa qarsy sharalar jasalýda» dedi aımaqtyq TJD baspasóz qyzmetinen.
Aıta keteıik, sáýir aıynda kene shaqqan Baızaq aýdanynyń turǵyny kóz jumǵan bolatyn. Oblystyq densaýlyq saqtaý basqarmasynda atap ótkendeı, Baızaq aýdany osyǵan deıin Kongo-qyrym qyzbasynyń oshaǵy bar aımaqqa jatpaǵan, endi Jambyl oblysynyń sondaı aımaqtaryna jatqyzylatyn bolady. Oblys boıynsha Kongo-qyrym qyzbasynyń oshaǵy Moıynqum, Sarysý men Talas aýdandarynda - 70 myń adam turatyn 49 eldi mekende taralǵan bolatyn.
