Toǵyzqumalaqtan Eýropa chempıonaty Shvaınfýrtta (Germanıa) 23-24 shilde aralyǵynda ótti. Eýropa chempıonatyna Germanıa, Fransıa, Grekıa, Shveısarıa, Ispanıa, Reseı, Chehıa jáne taǵy basqa onnan astam memleket sportshylary qatysty. Chempıonat shveısar júıesi boıynsha, erler men áıelder arasynda uıymdastyryldy, - dep habarlaıdy Qamshy.kz.

Eýropa chempıonaty ashylýyna Dúnıejúzilik toǵyzqumalaq federasıasynyń prezıdenti Alıhan Báımenov pen Qazaqstan Mádenıet jáne sport mınıstrligi Sport jáne dene shynyqtyrý isteri Komıtetiniń tóraǵasy Elsıar Qanaǵatov, Shvaınfýrt meri Karl Haıns Kaýchok qatysty.  

«Toǵyzqumalaq - qazaqtyń dúnıejúzilik mádenıetke qosqan jarqyn úlesiniń biri. Chempıonat  - ıntellektýaldyq saıys, mádenı shara ǵana emes, mádenı muramyzdy nasıhattaý joly. Bul – dúnıejúzilik federasıanyń qurylǵan kúninen bastap alǵa qoıǵan mindetteriniń biri», - dep atap ótti Alıhan Báımenov. 

Dúnıejúzilik federasıa 2009 jyldan beri toǵyzqumalaqtan úsh ret álem chempıonatyn ótkizip, úshinshisine 25 el ókilderi qatysqan. Chempıonattardyń ótýine otandyq kásipkerler Dinmuhammed Ydyrysov, Keńes Raqyshev, Erlan Áshim, Maqsat Ramanqulov, Erǵalı Ibragımov qolǵabys tıgizýde. Sońǵy jyldary memleket tarapynan da toǵyzqumalaqty damytýǵa júıeli kóńil aýdarylýda. Qazirgi tańda toǵyzqumalaqpen aınalysatyn qazaqstandyqtar sany 200 myńnan asty. Alda Azıa chempıonatyn uıymdastyrýǵa Qytaı ókimeti óz tarapynan qoldaý kórsetýge nıet bildirip otyr.

Eýropa chempıonaty barysyndaǵy halyqaralyq týrnırge Qazaqstan Ulttyq qurama komandasy músheleri de qatysyp, sheteldik sportshylardyń sheberligin arttyryp, tájirıbe jınaqtaýyna kómek kórsetti.  Jarysqa qatysýshylar men toǵyzqumalaq áýestenýshileri – negizinen Eýropa elderinde turyp jatqan jergilikti halyq.

Chempıonat aıasynda, sondaı-aq, ulttyq oıyndy halyqaralyq deńgeıde odan ári damytý máseleleri de keńinen talqylandy.