Jambyl oblysynda 25 jastaǵy azamattyń qazasyna jaqyndary tártip saqshylaryn kinálýda, - dep habarlaıdy Qamshy.kz KTK arnasyna silteme jasap.
Aıtýlarynsha, Erik Tórqulovty kólikterine din-aman salyp áketken polıseıeler keıin onyń óli denesin aýrýhanaǵa jetkizipti. Iaǵnı Erikti qyzyl jaǵalylar mashınanyń ishinde jazym etkenderine senimdi. Al, oblystyq ishki ister departamentiniń basshylyǵy qyzmetkerlerine shań jýytatyn emes.
Erik Tórqulovtyń ólerinen kún buryn ǵana úılený toıy bolǵan. Ertesine jaqyndarymen taýdaǵy sý qoımasyna shomylýǵa barypty. Ruqsat etilmegen jerde júrgenderi úshin qaraýylmen sózge kep qalsa kerek. Biraq janjalǵa jetkizbeı oqıǵa orynan ketip qaldyq deıdi marqumnyń jaqyndary. Biraz ýaqyttan soń bes azamat otyrǵan jerge úsh tártip saqshysy jetip, aı-shaıǵa qaramaı Erikti kólikterine kúshtep salyp áketipti.
-Mashınaǵa saldy uzynnan, bireýi basyna ekinshisi aıaǵyna otyryp aldy. Ústine otyryp aldy. Rólde ótyrǵan ınspektor aldyna otyryp ketip qaldy, - deıdi dosy Álı Bashaev.
Álı Eriktiń de polıseılerge qarsylyq kórsetkenin moıyndap otyr. Ol tártipke baǵynbaǵasyn ábden sabap, bilgenderin jasady deıdi. 25 jastaǵy azamat sol mashınaǵa otyrǵasyn ony tirideı eshkim kóremegen. Nebári jarty saǵattan soń óli denesi aýrýhanaǵa jetkizilipti.
-Dárigerler jazyp otyr ǵoı. Adamdy ákelip mashınadan túsirgen kezde ólip qalǵan dep bári aıtyp otyr. kelgen kezde. Sap-saý ketken bala. Ol polıseıdiń qolyn tistep alǵan moıynnan qylqyndyrǵan kezde, - deıdi aǵasy Ernur Tórequlov.
Mashına ishinde ne bolǵanyn eshkim bilmeıdi. Alaıda, marqumnyń jaqyndary Erikke kúsh kórsetilgenine, ony tártip saqshylary abaısyzda óltirip alǵandaryna senimdi. Óıtkeni deni saý zińgitteı azamttyń, ózdiginen ajal qushýy múmkin emes deıdi. Sondyqtan Qýanysh Tórqulov balasyn jazym etkenderdi eń qatań jazaǵa tartýdy talap etýde.
-Naǵyz kináliler solar ekenine sózim jetedi. Kelinim qaldy ishinde balasymen. Endi ol qalaı bolady, bárimiz eńirep artynda qaldyq. Qýanyshymyz kópke sozylmady. Jazaǵa tatylýyn suraımyn, - deıdi ákesi Qýanysh Tórequlov.
Dárigerler Erik Tórqulovtyń klınıkalyq ólim jaǵdaıynda jetkizilgenin aıtýda. Aqhalattylar ony dereý jansaqtaý bólimine jatqyzyp, ajalmen arpalysqan. Alaıda, áreketterinen túk shyqpapty. Al, quzyrly oryn basshylyǵy ádettegideı qol astyndaǵy qyzmetkerlerin kinásiz deıdi. Aıtýlarynsha, Erik sý qoımasynyń 75 jáne 20 jastaǵy qaraýylymen tóbeles kezinde jaraqat alýy múmkin. Degenmen tártip saqshylaryna qatysty da ústinen tekserý bastalǵan.
-İİD Ózindik qaýipsizdik basqarmasymen ólim sebepteri jáne polısıa qyzmetkerleriniń zańdylyǵyn anyqtaý úshin sotqa deıingi tergeý amaldary júrgizilýde. Kisi ólimine qatysty sot-medısıanlyq saraptamalar taǵaıyndaldy, - deıdi Jambyl oblystyq İİD basqarmasy memlekettik til jáne aqparat bóliminiń bas mamany Qundyz Bógenbaeva.
Polıseılerdiń málimetinshe Erik Tórqulov tártip saqshylaryna edáýir qarsylyq kórsetip, tipti dene jaraqatyn keltirgen. Sol úshin marqumnyń ústinen buzaqylyq jáne bılik ókiline baǵynbaý deregi boıynsha is qozǵalǵan. Al, bul qaıǵyly jaǵdaıdyń aq-qarasy sot-medısınalyq saraptamasy qorytyndysynan soń anyqtaýly tıis.
