Qazaqstanda 2015 jyldyń tamyz aıynan bastap, teńgeniń erkin ózgermeli aıyrbas baǵamy rejimi engizilgen. Soǵan sáıkes, teńgeniń aıyrbas baǵamy birqatar faktorlar, solardyń ishinde munaı baǵasy men saýdalyq áriptes elderdiń valútalarynyń baǵamyna sáıkes qubylyp otyrady. Bul týraly búgin QR Ulttyq banki monetarlyq operasıalar jáne aktıvterdi basqarý departamenti dırektorynyń orynbasary Ádil Muhamedjanov málimdedi, - dep habarlaıdy Qamshy.kz QazAqparatqa silteme jasap.
Bul rette teńgeniń baǵamyna naryqqa qatysýshylardyń kútýleri, búdjet qarajatynyń qozǵalysy, salyq tóleý kezeńderi jáne sońǵy aılardaǵy - dollarsyzdandyrý úrdisi sıaqty ishki faktorlar da áser etedi.
Sonymen qatar, ol aǵymdaǵy jyldyń shildesinde munaı baǵasynyń tómendeý úrdisiniń baıqalǵanyn, oǵan munaı ónimderi naryǵyndaǵy usynys kóleminiń ósýi, AQSH-taǵy munaıdyń jetkilikti qory týraly derekterdiń jarıalanýy, sondaı-aq AQSH-taǵy burǵylaý uńǵymalary sanynyń ulǵaıýy da sebepshi bolǵanyn atap ótti.
«Sońǵy kezde rúbldiń serpini munaı baǵasynyń ózgerýine sezimtaldyqtyń tómendegenin kórsetti. Soǵan qaramastan, rúbldiń AQSH dollaryna qatysty quny munaı baǵasynyń quldyraýy aıasynda tómendedi», - dep tolyqtyrdy Á. Muhamedjanov. Osylaısha, onyń aıtýynsha, joǵaryda kórsetilgen faktorlar 2016 jylǵy 26 shildede Qazaqstan Qor bırjasynda teńgeniń 350.2 deńgeıge deıin álsireýine sebep boldy.
